Ötən gün Bolqarıstanın "Bulgartransgas” şirkəti Azərbaycandan ölkəyə qaz nəqlinin dayandırılması barədə məlumat yaymış, bunun texniki problemlə bağlı olduğunu açıqlamışdı. Şirkətin yaydığı məlumata görə, TAP-la Azərbaycandan verilən qaz həcmləri gündəlik olaraq 5,5 milyon kubmetr azalıb.

Enerji məsələləri üzrə ekspert İlham Şaban bildirib ki, Bolqarıstana qaz nəqlinin dayanmasına səbəb "Şahdəniz” yatağındakı "Alfa” platformasında qaz hasilatının müvəqqəti dayandırılmasıdır.

Ekspert hesab edir ki, neft-qaz istehsalatında belə hallar olur:

"bp şirkətindən aldığım məlumata görə, hasilat platformalarında heç bir problem yoxdur. Konsorsium "Alfa” platforması ilə Səngəçal terminalı arasındakı sualtı kondensat boru kəmərində texniki problemlə üzləşib. Bu səbəbdən də "Alfa” platformasından hasilat müvəqqəti dayandırılıb. Ən əsası boruda heç bir sızma baş verməyib, platformadakı qurğular üçün hansısa təhlükə yaranmadığı vurğulanır”.

Bolqarıstan şirkəti Azərbaycan tərəfdən bununla bağlı xəbərdar edildiklərini və qaz çatışmazlığını aradan qaldırmaq üçün BOTAŞ-dan Türkiyə üzərindən həcmlər aldığını açıqlayıb.

musavat.com