O, Rusiya T-90S tanklarının Azərbaycana satılmasını siyasiləşdirməməyi təklif edib.
Ermənistan parlamentinin deputatı, keçmiş nazir müavini Manvel Qriqoryan Rusiya T-90S tanklarının Azərbaycana satılmasını siyasiləşdirməməyi və bu sazişə görə narahat olmamağı təklif edib.
“Qorxulu heç nə yoxdur. Onsuz da Azərbaycan sonunda bu silahları bizimlə yarı böləcək, müharibə başlasa biz qalib gələcəyik və Bakının aldığı silahın yarısı bizə qalacaq”, - bunu general jurnalistlərlə görüşündə bəyan edib.
Ermənistan bu gün qonşu dövlətlə müharibə şəraitindədirmi? sualına Qriqoryan belə cavab verib:
“Xeyr, hər şey nəzarət altındadır. Lazım olan an cavab zərbəsi endirəcəyik. İndi isə heç bir təhlükə yoxdur”.
Xatırladaq ki, 2010-2012-ci illərdə Rusiya Azərbaycanla ümumi məbləği dörd milyard dollar olan hərbi məhsulun alınması barədə müqavilə bağlayıb. Söhbət zenit raket kompleksləri C-300PMU-2, “Tor-M2E”, 70 helikopter, 100 T-90S və 100 hərbi piyada maşınları BMP 3, eləcə də “Smerç” reaktiv sistemlərindən gedir.(Oxu.az)
