Hər bir xalqın həyatında elə təqvimlər olur ki, həmin təqvimlər bu xalqın taleyində mühüm rola malik olur. 16 oktyabr o təqvimlərdəndir ki, Azərbaycanda bir çox əlamətdar hadisələrlə yadda qalıb.
AZXEBER.COM 16 oktyabrda Azərbaycanda baş verən və ölkəmizin həyatına təsirsiz ötüşməyən tarixi hadisələrin xronoloji ardıcılıığını hazırlayıb.
1921-ci ilin bu günündə Azərbaycan SSR Dövlət Bankı təsis edilib. Müstəqil Azərbaycan Respublikasının bank sisteminin, o cümlədən Milli Bankın yaradılması üçün hüquqi baza bundan bir qədər əvvəl formalaşsa da, məhz bu bankın yaradılması ilə ölkəmizdə bank sektoru sistemli şəkildə formalaşmağa başladı. 1991-ci ildə ölkəmiz dövlət müstəqilliyi əldə edəndən sonra ölkəmizdə digər sahələrlə yanaşı bank sektorunda da sürətli inkişaf baş verdi və hazırda Azərbaycanda onlarla bank fəaliyyət göstərir.
1951-ci ilin bu günündə uzun illər ölkəmizin ən böyük futbol stadionu olan Tofiq Bəhrəmov adına Respublika Stadionu istifadə verilib. Tikintisinə 1939-cu ildə başlanılsa da, Böyük Vətən müharibəsinin başlaması ilə əlaqədar stadionun tikinti işləri yarımçıq qalıb. Eyni zamanda 30 mindən artıq azarkeşi qəbul etməyə hazır olan stadion Cənubi Qafqazın ən böyük stadionlarından biridir.
1990-cı ilin bu günündə Azərbaycanın da daxil olduğu SSRİ rəhbəri Mixail Qarbaçov "bazar iqtisadiyyatına keçid" haqqında qərar verdi. Bu qərar sovet ittifaqının çöküşü üçün zəmin rolunda çıxış etdi. Məhz bu qərardan sonra illərdir formalaşan sovet iqtisadiyyatının gözlənilən keçid dövrünə hazır olmaması onun süqutunu tezləşdirdi. Postsovet ölkələrində, o cümlədən Azərbaycanda başlanan müstəqillik hərəkatı daha da gücləndi.
1992-ci ilin bu günündə Azərbaycanın 91 tanınmış ziyalısı o zamanlar Naxçıvan Muxtar Respublikası Ali Məclisinə sədrlik edən Heydər Əliyevə müraciət ünvanladı. Ölkə ziyalıları Azərbaycan xalqının təkidli tələblərinə qoşularaq, xalqı bu ağır durumdan çıxarmaq üçün Ulu Öndər Heydər Əliyevi Bakıya dəvət etdi.
2003-cü ilin bu günündə prezidentliyə keçmiş namizəd İsa Qəmbərin tərəfdarları paytaxtda qanunsuz aksiya təşkil edərək, müxtəlif təxribatlar törətdilər. Aksiya zamanı 1 nəfər öldü, onlarla insan yaralandı. Onların arasında dinc sakinlərlə yanaşı hüquq-mühafizə orqanlarının əməkdaşları da var idi.
2004-cü ilin bu günündə Heydər Əliyev adına Bakı-Tiflis-Ceyhan boru kəmərinin Azərbaycan və Gürcüstan ərazilərindən keçən hissələri təntənəli mərasimlə birləşdirildi. 2006-cı ilin iyun ayından istismara verilən boru kəmərinin gündəlik ötürmə gücü hazırda 1,2 milyon bareldir. Boru kəməri Azərbaycanda 13 Gürcüstanda 7 və Türkiyədə 9 bölgədən keçir.
Azər Niftiyev,
AZXEBER.COM
