Soyğunçuluqda təqsirləndirilən Azərbaycanın sərbəst güləş üzrə Avropa çempionu olmuş Anar İsmayılovun cinayət işi üzrə məhkəmə prosesi davam edib.
Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilən prosesdə təqsirləndirilən şəxsin hadisəni törədən vaxtı anlaqlı vəziyyətdə olub-olmamasını araşdırmaq üçün məhkəmə psixiatrik ekspertizası təyin olunub.
O, 1 saylı Respublika Psixiatriya Xəstəxanasına göndərilib.
Buna görə məhkəmə prosesi qeyri-müəyyən vaxtadək təxirə salınıb.
Qeyd edək ki, A. İsmayılova Cinayət Məcəlləsinin 180.1 (Soyğunçuluq) maddəsi ilə ittiham edilir. Barəsində polisin nəzarətinə verilmə qətimkan tədbiri seçilib.
Xatırladaq ki, A. İsmayılov idmançıdır. O, 2003-cü ildə yeniyetmələr arasında sərbəst güləş üzrə Makedoniyada keçirilən Avropa çempionatında 54 kq çəki dərəcəsində qızıl medal qazanıb.
///Lent.az
