Bakı şəhəri İlqar İbrahimov adına 167 nömrəli tam orta məktəbin şagirdi Camal Əfəndi beynəlxalq mükafatlara layiq görülüb.
AZXEBER.COM xəbər verir ki, C.Əfəndi 2025-ci il mart ayında Nyu Yorkda BMT- nin baş ofisində keçirilən "Change the World MUN” konfransında ölkəmizi uğurla təmsil edib.
194 ölkədən qatılmış 7000 gəncdən ibarət olan konfransda 15-18 yaşlı nümayəndələr arasında 10 mükafatdan ikisini Azərbaycan qazanıb.
Həmin mükafatları qazanan şagirdlərimizdən biri də Camal Əfəndidir.
O, beynəlxalq məsələlərin müzakirəsində analitik düşüncə tərzi, mükəmməl nitq qabilliyyəti, araşdırma və s qabilliyyətinə görə "Best Delegate” və "Best Delegation” mükafatlarına layiq görülüb. Daha sonra Camal Əfəndi BİC - ofisinə dəvət alıb.
Onu da qeyd edək ki, bu Camal Əfəndinin iştirak etdiyi ikinci beynəlxalq miqyaslı tədbir olub. Onun iştirak etdiyi ilk tədbir Fransada UNESCO-nun baş ofisində olub. Həmin vaxt o, "Honorable Mention” mükafatına layiq görülmüşdü.
Camal Əfəndi ilə yanaşı, Alpay Novruzov, Bakı şəhəri İ.Hacıyev adına "Tərəqqi" texniki-humanitar liseyinin 10-cu sinif şagirdləri Lalə Musayeva və Omar Qurbanov da CWMUN konfransında nailiyyətlər əldə ediblər. Belə ki, adları çəkilən hər iki məktəbli "Change the World Model United Nations New York 2025”də ölkəmizi BMT-nin baş ofisində təmsil ediblər.
194 ölkədən bir araya gələn 7000 gənc arasında şagirdlərimiz "Honourable mention” mükafatına layiq görülüblər.
Məlumat üçün bildirək ki, CWMUN - BMT formatında keçirilən konfransdır. Bu tədbir diplomatiya ilə maraqlanan gənclərin, şagirdlərin bir araya gəlib beynəlxalq məsələləri müzakirə edib, həll yolunu tapma platformasıdır.
Konfransa qatılan iştirakçılar müxtəlif ölkə və təşkilatları təmsil edərək müzakirə bacarıqlarını inkişaf etdirirlər. Bunun üçün iştirakçılar geniş tədqiqat aparmalı, sosial ədalət, insan haqları, ekoloji problemlər, səhiyyə və digər məsələlərə dair müzakirələr etməlidirlər.
Vətənimizi layiqincə təmsil edən gənclərimizə uğurlar arzu edirik.
