Azərbaycanın ən böyük mobil operatoru istifadəçilərinə qarşı zor gücü tətbiq edir
Azərbaycanda mobil rabitə xidmətinin gündən-günə inkişaf etdiyi bir gündə özünün geniş imkanlarından istifadə edən Azercell şirkəti növbəti fırıldaqçı üsula əl atıb. İndiyə kimi bu şirkətin xaricdə olan istifadəçilərini necə aldatdığı və xaricdə olarkən danışmadığı halda külli miqdarda borc yazılması ilə bağlı məlumatlar mətbuatda kifayət qədər dərc olunub.
Əsassız borcları istifadəçilərinin balansına yazan Azercell bu fırıldaqçı siyasətini əsasən fakturalı xətt abonentlərinə qarşı aparır. Bu dəfə isə redaksiyamıza bir qrup fakturalı xətt abonenti müraciət edərək, Azercell şirkətinin onların evinə qeyri-qanuni məhkəmə icra məktubları göndərdiyi barədə şikayət etdilər. Belə ki, Azercell şirkəti bir çox abonentə əlavə borc yazır, borcun gecikdiyini əsas gətirərək, məhkəməyə müraciət edir və məhkəmə icraçılarına rüşvət verərək, həmin yalançı borcları zorla istifadəçilərdən alırlar.
Presspost.az İnformasiya Portalının müxbiri ilə söhbət zamanı bir müştəri özünün də başa düşmədiyi 80 azn borcu 4 ay bundan öncə ödəməsinə baxmayaraq, Binəqədi rayonu məhkəmə icraçılarının onun evinə dəfələrlə xəbərdarlıq göndərdiyini və borcu ödəməsə, zorla ödətdirəcəkləri barədə hədə-qorxu gəldiklərini söyləmişdir. Şikayətçinin sözlərinə görə, Binəqədi rayonu məhkəmə icrası şöbəsinin rəisi, kiçik ədliyyə müşaviri Anar Qocayevin imzası ilə daxil olan xəbərdarlıq sənədində həmin borcun ödənilməsi tələb olunur. Əks halda, zorla ödəniləcəyi barədə hədə-qorxu gəlinir. Şikayətçi isə bildirir ki, həmin borcu düz 4 ay bundan əvvəl ödəyib. Azercel şirkətinə müraciət etsə də, şirkətdən bildiriblər ki, məhkəmə icraçıları ilə istifadəçi arasındakı münasibətlərə müdaxilə edə bilməzlər. Halbuki, məhkəməyə Azercell şirkəti özü müraciət etmiş və borcun ödənilməsini tələb etmişdir. Borc ödənilsə də, məhkəmə icraçıları istifadəçidən əl çəkmək istəmirlər. Azercell borcun ödənilməsinə qədər məhkəməyə müraciət etdiyi kimi, borcun ödənilməsindən sonra da məhkəməyə bu barədə sənəd göndərilməli idi ki, məhkəmə icraçıları istifadəçiləri bezdirməsinlər. Görünür, Azercell şirkəti yalnız öz maddi maraqlarını düşünür, əhaliyə keyfiyyətli xidmət isə yalnız reklamlarda olur. /// presspost.az
