"Fənərbağça" klubunun prezidenti Aziz Yıldırım mövsümün sonunda komandanın nəticələrindən asılı olmayaraq, vəzifəsindən istefa verəcəyini açıqlayıb.
AZXEBER.COM Türkiyə KİV-ə istinadən xəbər verir ki, Aziz Yıldırım bu barədə jurnalist Ferudun Niğdelioğluya açıqlamasında bildirib.
Baş məşqçi İsmail Kartalla bağlı son hadisələrə toxunan Aziz Yıldırım UEFA Çempionlar Liqasında komandaya güvəndiyini deyib:
"İsmail Kartal mən klub prezidenti olduğum müddətcə komandada qalacaq. Biz onu razı salmağa çalışmadıq, ondan soruşduq ki, "Davam edirsən, ya yox? Bu sənin son qərarındır?" O da "Bu mənim son qərarımdır, davam edirəm", - dedi.
Komanda hələ hazır deyil, amma söz verdiyim kimi, komandanı Çempionlar Liqasına daşıdıq. Çempionlar Liqasında bu komandaya güvənirəm və inanıram. Onlar daha yaxşı nəticələr əldə edəcəklər və "Fənərbağça"ya həm pul, həm də xal qazandıracaqlar".
