Dünyanın bir çox ölkələrində elektrikli skuterlərdən, velosipedlərdən
istifadə üçün xüsusi yerlər ayrılıb. Dünyada ən çox skuterlərdən və velosipedlərdən istifadə edənlər niderlandlılardır. Belə ki, Niderlandda əhalinin
99,1 faizi velosipeddən istifadə edir. Danimarkalılar da 80,1 faizlə Niderlandlılardan
heç də geri qalmırlar. Bu siyahıda üçüncü yeri 75,8 faizlə Almaniya izləyir.
Bu statistikadan çıxılan
nəticə isə yalnız birdir – bir şəhərdə velosiped yolları varsa, deməli, həmin şəhərdə
ətraf mühitin, infrastrukturun və mədəniyyətin inkişafına xüsusi diqqət
yetirilir.
Bunun üçün bir çox
ölkələrdə avtomobil
yollarında belə zolaqlar əlavə edilib. Amma bununla bərabər, həmin ölkələr parklarda, ictimai
yerlədə elektrikli skuterlərdən isitfadə qadağandır. Bunun üçün xüsusi cərimələr
də müəyyən edilib.
Məsələn, İngiltərədə yollarda və səkilərdə
elektrikli skuterlərin sürülməsi qanunsuzdur. Baxmayaraq ki, bu ölkədə elektrikli
skuterlərin sayı kifayət qədərdir.
Bütün bu nümunələrdən çıxılan nəticə birdir. Azərbaycanda
elektrikli skuterlərin istifadəsi qaydalarına tam əməl olunurmu?
AZXEBER.COM olaraq bu mövzunu araşdırmaq qəranına gəldik.
Sosial şəbəkələrdə yazılan statuslarından və
ümumilikdə bu statuslara gələn rəylərdən gəldiyimiz nəticəyə görə, Azərbaycanda
elektrikli skuterlərlə bağlı məsələ heç də ürəkaçan deyil.
Hər gün Dənizkənarı Bulvar ərazisində, parklarda, insanların kütləvi şəkildə hərəkətdə olduğu yerlərdə elektrikli skuterlərdən, velosipedlərdən istifadə edənlər insanlar üçün təhlükə yaradır. Hətta onların insanlarla toqquşması, bu səbəbdən xəsarət alanların sayının artması faktları günü-gündən çoxalır. İnsanlar arasında da bu səbəbdən narazılıqlar artır.
Sosial şəbəkələrdə yazılan məlumatlara görə, Dənizkənarı Bulvar İdarəsi narazlığın çox olmasına baxmayaraq, məsələnin həllində
heç bir köklü islahat aparmır.
AZXEBER.COM mövzu ilə bağlı Dənizkənarı Bulvar İdarəsinin
İdarə Heyəti sədrinin müşaviri Könül İmamverdiyeva ilə əlaqə saxlayıb.
O, bildirib ki, bulvar
ərazisində bununla bağlı xüsusi qadağalar var və hər kəs buna riayət etməlidir:
"Velosipedlər və elektrikli skuterlərin istifadəsi ilə bağlı Ağ Şəhər və Yeni
Bulvar ərazisində xüsusi zolaqlar ayrılıb. Azərbaycan vətəndaşları
velosiped, skuterlər sürərkən həmin zolaqlardan istifadə etməlidir. O ki qaldı
köhnə Bulvar ərazisində, orada çoxlu insanın istifadə etdiyini nəzərə alaraq
xüsusi qadağa işarələri yerləşdirilib. Velosipedlərin və skuterlərin sürülməsinə
həmin ərazidə icazə yoxdur. Bu qadağa işarələrinə hər bir vətəndaş riayət etməlidirlər
və həmin ərazilərdə bunlardan istifadə etməməlidirlər”.
Könül İmamverdiyeva onu
da qeyd edib ki, Bulvarda
fəaliyyət göstərən mühafizə əməkdaşları bunu xüsusi nəzarətdə saxlayırlar:
"Bulvarda fəaliyyət göstərən mühafizə əməkdaşları buna ciddi nəzarət edirlər.
Onları gördükləri halda müdaxilə edirlər. Çünki bunlar sürətli hərəkət edən nəqliyyat
vasitəsidir. Bunlardan istifadə zaman qadağa işarələrinə diqqət etməlidirlər.
Qanunsuz ərazilərdə istifadə edildiyi zaman bizim əməkdaşlar tərəfindən bu,
ciddi nəzarətdə saxlanılır”.
Rəsmi açıqlamadan aydın olur ki, idarə bu işlə məşğul
olur. Bəs, idarə bu işlə məşğul olursa hər gün qocaların, uşaqların, qadınların
həyatlarını təhlükə altına atan skuterlər nəyə görə onlar üçün ayrılmış zolaqlarda deyil, insanların çoxluq təşkil etdiyi ərazilərdə gəzir?
Bu suala isə cavabı yalnız Bakı Bulvarının ziyarətçiləri
verə bilər. Ümid edirik ki, bundan sonra bu məsələyə daha da ciddi yanaşılacaq və insanların istirahətini pozanlar cəzalandırılacaq.
Aydın Nuri
