Paytaxt sakini Rövşən Əliyev deyir ki, aylar əvvəl qardaşı vasitəsilə tanış olduğu və özünü Türkiyə vətəndaşı Aşkın Güvən Linkoln kimi təqdim edən şəxsə onu Almaniyada işə düzəltməsi üçün 20 min manatdan çox pul verib.
AZXEBER.COM Xezerxeber.az-a istinadən xəbər verir ki, Rövşən Əliyev deyib ki, "hər şey həll olundu" dedikdən sonra sözügedən şəxsin yenə pul tələb etməsi onun şübhələndirib. Aldadıldığını da bundan sonra anlayıb.
Məsələ ilə bağlı əvvəlcə adı dələduzluqda hallanan Aşkın Güvən Linkoln adlı şəxslə əlaqə yaratmağa çalışdıq. Ünvanı da bilinməyən bu şəxsin mobil nömrəsinə zəng çatmadı. Daha sonra Rövşən Əliyevin qardaşı Rafiz Ramizli ilə də əlaqə saxladıq. O bildirdi ki, həmin şəxs tərəfindən özü də aldadılıb. Ondan da İngiltərədə işə düzəltmək adı ilə 10 min manata yaxın pul alıb. Onu da qeyd etdi ki, həmin şəxs artıq ölkəni tərk edib.
DİN-in Mətbuat xidmətinin əməkdaşı Cəsarət Qənbərli isə bildirdi ki, vətəndaşın xaricdə işə düzəltmək adı ilə aldadılaraq pul vəsaitinin ələ keçirilməsi barədə polisə müraciəti daxil olub. Müraciətlə bağlı Binəqədi Rayon Polis İdarəsinin 43-cü polis şöbəsində təhqiqat araşdırmaları aparılır.
Toplanmış materiallar əsasında dələduzluq faktına hüquqi qiymət verilməsi istiqamətində prosessual tədbirlər davam etdirilir.
