Ötən gün bloger Aytən Novruzova sosial şəbəkə hesabından ticarət mərkəzlərindən birindən aldığı qızıl zinət əşyasının yararsız hala düşməsindən bəhs edən videogörüntü yayımlayıb.
Şikayətçinin sözlərinə görə ona "Laçın Ticarət Mərkəzi"ndən aldığı qızıl bilərziyin içində dəmir olması haqda heç bir məlumat verilməyib və o məhsula qızılın qramı üçün hesablanmış tam məbləği ödəyib.
Videonun sosial şəbəkədə yayılması ilə bir çox mütəxəssis hadisəyə rəy bildirərək, bu tipli qolbaqların içərisində dəmir parçasının olmasının normal hal olduğunu, bunun zinət əşyasının formasını qorumağa kömək etdiyini bildirib. Bir qrup istifadəçi isə sözügedən hadisənin istehlakçıların aldadılması kimi qiymətləndiriblər.
İqtisadi ekspert Əkrəm Həsənov məsələ ilə bağlı AZXEBER.COM-a açıqlama verib:
"Hər bir alıcıya məhsulu alan zaman təbii ki, onunla bağlı tam məlumat verilməlidir. Bununla yanaşı məhsulun bütün məlumatları onun üzərində qeyd olunmalıdir. Əgər məhsulu alan zaman onun çəkisi, üzərində yazılan çəki ilə üst-üstə düşmürsə bunu araşdırmaq lazımdır.
Belə məhsullar alıcıya təqdim olunan zaman içərisindəki dəmir parçasının qramı hesablanaraq məhsulun ümumi qramından çıxılmalıdır. Əks halda müştəri aldadılmış olacaq.
Bu zaman təbii ki, onun ixtiyarı var ki, məsələni hüquqi yolla həll etsin. O, satıcıdan həm məhsula ödədiyi məbləği, həm də mənəvi zərər üçün hesablanmış məbləği tələb edə bilər.
Bunu da təbii ki, məhkəmə təyin edir. Əgər məhsulun içərisində dəmir olduğu qeyd edilərək, onun çəkisi üçün pul tələb olunmursa burada heç bir aldatmadan söz gedə bilməz".
Həmin görüntüləri təqdim edirik:
Aysel Hacızadə
