“Mən Azərbaycana könüllü şəkildə keçmişəm və bu ölkənin hökumətinə mənə siyasi sığınacaq verdiyinə görə təşəkkür edirəm” - deyə Vaan Martirosyan bu gün Bakıda keçirdiyi mətbuat konfransında bildirib.
Erməni fəalın sözlərinə görə, Ermənistanda heç bir normal adam Azərbaycanla müharibənin olmasını istəmir: “Biz sülh istəyirik. Erməni ordusu dəhşətli dərəcədə ağır vəziyyətdədir və o, nəinki Azərbaycanın, hətta üçüncü dərəcəli Afrika ölkəsi ordusunun hücumlarını dəf etməyə qadir deyil”.
Azərbaycanda ona çox gözəl şərait yaradıldığını deyən V.Martirosyan bildirib ki, Bakıda çox gözəl oteldə qalır: “Dünən isə tək-tənha şəhərə çıxıb gəzmişəm. Ermənistanda bizə Azərbaycan haqda yalan məlumatlar sırımağa çalışırdılar. Əminəm ki, əgər Ermənistanda Azərbaycandakı real vəziyyətin necə olduğunu bilsələr, Azərbaycana axışacaq erməni qaçqınların sayı Avropadakı ərəblərin sayından çox olacaq”.
