2 may tarixində Bakıda Kənd Təsərrüfatı Nazirliyi yanında Aqrar Kredit və İnkişaf Agentliyinin (AKİA) təşkilatçılığı, BMT-nin Ərzaq və Kənd Təsərrüfatı Təşkilatının (FAO) maliyyə dəstəyi ilə IV Aqrobiznesin İnkişafı Forumu keçirilib.
AZXEBER.COM xəbər verir ki, "Harmoniyaya gedən yol” mövzusuna həsr olunan tədbirin əsas məqsədi aqrobiznesin davamlı inkişafı üçün innovativ maliyyələşmə mexanizmlərinin tətbiqi, yaşıl subsidiyaların təşviqi və ictimai-özəl dialoqun gücləndirilməsi olub .
Forumda Kənd Təsərrüfatı və İqtisadiyyat nazirliklərinin, Mərkəzi Bankın, Azərbaycan Qida Təhlükəsizliyi Agentliyinin, Kiçik və Orta Biznesin İnkişafı Agentliyinin, Azərbaycan Sahibkarlar Təşkilatları Milli Konfederasiyasının rəhbər şəxsləri, nazirliklərin tabeli qurumlarının, Azərbaycan Banklar Assosiasiyasının, ölkədə fəaliyyət göstərən bankların, həmçinin yerli və beynəlxalq təşkilatların nümayəndələri iştirak ediblər .
Aqrar sahənin maliyyələşdirilməsi istiqamətində həyata keçirdiyi davamlı fəaliyyətə görə Bank Respublika "Fermerlərin dövlət vəsaitləri hesabına kreditləşməsində ən aktiv iştirak edən bank” nominasiyası üzrə artıq üçüncü ildir ki, ardıcıl olaraq mükafata layiq görülüb.
Qeyd edək ki, ötən il ərzində Bank Respublika Aqrar Kredit və İnkişaf Agentliyi, Sahibkarlığın İnkişafı Fondu və İpoteka və Kredit Zəmanət Fondu ilə fəal əməkdaşlıq edərək fermerlərə ən böyük həcmdə güzəştli kreditlər təqdim etmişdir.
