Kümçülər təhvil verdikləri baramanın pulunu ala bilmirlər.
AZXEBER.COM Xəzər Tv-yə istinadən xəbər verir ki, Balakən rayonundan olan kümçülərin sözlərinə görə, ödənişlər bir aydan artıqdır gecikir. Rayonun Qasbinə kənd sakini Rafiq Məsimov deyir ki, iyunun 15-də təhvil verdiyi baramanın pulu hələ də hesabına köçürülməyib.
O bildirib ki, 40 qram ipəkqurdu toxumundan əldə etdiyi baramaya görə təxminən 600 manat almalıdır. Bu vəsaitlə borclarını ödəməyi planlaşdırsa da, ödəniş gecikdiyi üçün çətinlik yaşayır.
Hənifə kəndindən olan digər kümçü də eyni problemlə üzləşdiyini bildirir. Onun sözlərinə görə, ötən il barama pulu daha qısa müddətdə ödənilib, bu il isə proses xeyli uzanıb.
Məsələ ilə bağlı Balakən Dövlət Aqrar İnkişaf Mərkəzi ilə əlaqə saxladıq. Qurumun direktor vəzifəsini müvəqqəti icra edən Elvin Səmədov bildirdi ki, "Azəripək" MMC hər kiloqrama üçün 5 manat vəsaitin ödənilməsinə başlayıb. Dövlət tərəfindən yaş baramanın hər kiloqramına görə 6 manat subsidiyanın ödəniləməsinə də yaxın günlərdə başlanılacaq.
