“Bu ölkədə yaşayan bütün miqrantlara qarşı hüquqa zidd hərəkətlərin mövcudluğu bu günə kimi hamıya yaxşı bəlli idi”.
Bu sözləri AZXEBER.COM-a açıqlamasında Azərbaycan-Rusiya parlamentlərarası dostluq qrupunun üzvü, millət vəkili Fazil Mustafa son günlər Rusiyada baş verən hadisələri şərh edərkən belə söyləyib:
“Rusiya hakimiyyəti bazarı bağlamaq üçün belə bir oyundan istifadə etdi. İnsanları aldatmaq üçün isə adi bir kriminal olayı ortaya atdılar. Hələ məhkəmənin hökmü olmadan Rusiya Daxili İşlər Naziri tərəfindən həmyerlimizin qəbul edilməsi və şəxsiyyətinin alçaldılması heç bir hüquqi məntiqə sığmır. Bu yalnız azərbaycanlılarla bağlı bir məsələ deyil. Bu ölkədə yaşayan bütün miqrantlara qarşı hüquqa zidd hərəkətlərin mövcudluğu bu günə kimi hamıya yaxşı bəlli idi. Bu hadisə isə, bunu bir daha sübut etdi”.
Deputat Azərbaycanın məsələylə bağlı öz mövqeyini ortaya qoymasının vacib olduğunu bildirib:
“Məsələylə bağlı, bizim dövlətimiz öz layiqli mövqeyini ortaya qoymalıdır. Məncə bu məsələdə biz öz sözümüzü deməliyik”.
Xatırladaq ki, Moskvanın Qərbi Biryulevo rayonunda 25 yaşlı Yeqor Şerbakovu qətlə yetirən əslən Şəmkir rayonundan olan Azərbaycan vətəndaşı Orxan Zeynalov saxlanılaraq istintaqa təhvil verilib.
Əfsələddin Ağalarov
