Belarus Milli Assambleyası Respublika Şurasının sədri Natalya Koçanova Azərbaycan-Slavyan Gəncləri Assosiasiyasının reallaşdırdığı "Azərbaycan-Belarus Gənclər Forumu" çərçivəsində Azərbaycandan gələn nümayəndə heyətini qəbul edib.
Görüşdə Azərbaycan tərəfdən - Azərbaycan Respublikasının Belarus Respublikasındakı fövqəladə və səlahiyyətli səfiri Məhərrəm Əliyev, Azərbaycan-Slavyan Gəncləri Assosiasiyasının sədri Səbuhi Abbasov, "İslahatçı Gənclər” İctimai Birliyinin sədri Fərid Şahbazlı, "PR Azərbaycan” Gənclər Araşdırma Mərkəzinin rəhbəri Müşfiq Hüseynov, Azərbaycan Mətbuat Şurası İdarə Heyətinin üzvü, Azxeber Media Qrupunun rəhbəri Hacıbəy Heydərli iştirak ediblər.
Belarus tərəfdən - Belarus Milli Assambleyası Respublika Şurasının sədri Natalya Koçanova, Respublika Şurasının beynəlxalq məsələlər və milli təhlükəsizlik üzrə daimi komissiyasının sədri Sergey Aleynik, Respublika Şurasının beynəlxalq məsələlər və milli təhlükəsizlik üzrə daimi komissiyasının üzvü Aleksandr Lukyanov, media nümayəndələri iştirak ediblər.
Tədbiri giriş sözü ilə açan xanım Natalya Koçanova Azərbaycan Respublikası ilə Belarus Respublikası arasında olan xoş münasibətlərin uzun illərə və tarixə söykəndiyini dedi: "Bu gün biz dövlətlərarası münasibətlərimizin strateji tərəfdaşlıq xarakteri daşıdığını xüsusi məmnuniyyətlə qeyd edirik. Təbii ki, bu, liderlərimizin apardığı siyasət sayəsində mümkün olub. Onlar hər şeyi edirlər ki, əlaqələrimiz inkişaf etsin, qarşılıqlı faydalı olsun, xalqlarımız dost olsun”.
Sonra Azərbaycan Respublikasının Belarus Respublikasındakı fövqəladə və səlahiyyətli səfiri Məhərrəm Əliyev çıxış edərək Azərbaycan-Belarus əlaqələrinin inkişafından danışdı: "Prezidentlərimiz bir-birinə hörmət edir, bir-birini qardaş hesab edirlər. Biz isə dost olmağa, problemləri problemsiz həll etməyə çalışmağa borcluyuq. Azərbaycan səfirliyi hər zaman gənclərin yanında olub və olacaq və bizdən asılı olanı nə varsa, hamısını reallaşdıracağıq".
Daha sonra Azərbaycan-Slavyan Gəncləri Assosiasiyasının sədri Səbuhi Abbasov çıxış edərək ASGA-nın QHT-lərə Dövlət Dəstəyi Agentliyinin dəstəyi ilə reallaşdırdığı "Azərbaycan-Belarus Gənclər Forumu"ndan danışdı: "İlk dəfədir ki, biz belə bir Forum reallaşdırırıq. Hesab edirik ki, bu Forum konkret istiqamətlər üzrə davam etməli, növbəti mərhələ Bakıda reallaşmalıdır. Bu gün Prezident İlham Əliyevin rəhbərliyi ilə ölkədə uğurlu gənclər siyasəti həyata keçirilir. Hesab edirik ki, bizdə doğma olan Belarus gəncləri ilə çox işlər görə bilərik".
"İslahatçı Gənclər” İctimai Birliyinin sədri Fərid Şahbazlı çıxış edərək Azərbaycan-Belarus əlaqələrindən, bu əlaqələrin perspektivlərindən danışdılar: "Bu gün ölkələrimiz arasında olan münasibətlər yüksələn xətt üzrə inkişaf edir. Hər iki ölkədə gənclər siyasəti dövlət siyasətinin əsas istiqamətlərindən biridir. Bu baxımdan hesab edirəm ki, Azərbaycanla belarus arasında gənclər siyasəti sahəsində əməkdaşlığın böyük potensialı var".
Sonra Azərbaycan Mətbuat Şurası İdarə Heyətinin üzvü, Azxeber Media Qrupunun rəhbəri Hacıbəy Heydərli çıxış edərək hər iki ölkə gəclərinin media sahəsində əməkdaşlıq perspektivlərindən danışdı: "Bu gün media dünyanın ən güclü silahına çevrilib. Belə bir yeniləşən dünyada informasiya təhlükəsizliyi, dezinformasiya ilə mübarizə, sosial medianın cəmiyyətə təsiri və bu kimi mövzular daha da aktullaşır. Hesab edirəm ki, hər iki ölkə gəncləri bu Forum çərçivəsində, növbəti mərhələdə birgə konfranslar, təlimlər, dəyirmi masalar reallaşdırmalıdırlar".
Sonda Belarus Parlamentinin sədri Natalya Koçanova və Azərbaycan Respublikasının Belarus Respublikasındakı fövqəladə və səlahiyyətli səfiri Məhərrəm Əliyevin iştirakı ilə Belarus Ümumrespublika Gənclər Şurası ilə Azərbaycan-Slavyan Gəncləri Assosiasiyası və "İslahatçı Gənclər” İctimai Birliyi arasında əməkdaşlıq memorandumu imzalandı.
