Dünən Azərbaycan milli komandasının baş məşqçisi Berti Foqts DÇ-2014-ün seçmə mərhələsi çərçivəsində sentyabrın 11-də Portuqaliyaya qarşı başa tutacaq oyunla əlaqədar mətbuat konfransı keçirib.

Qol.Az-ın Portuqaliyaya ezam olunmuş xüsusi müxbirinin verdiyi məlumata görə, mətbuat konfransında çoxsaylı jurnalist iştirak edib.

Əvvəlcə media nümayəndələrini salamlayan almaniyalı mütəxəssis daha sonra jurnalistlərin suallarını cavablandırıb.

- Komandanız Portuqaliya ilə oyuna hazırdırmı?

- Biz çox şadıq ki, belə gözəl şəraitdə çətin oyuna hazırlaşa bilirik. Bizim üçün asan olmayacaq. Azərbaycan millisi dörd gündə iki oyun keçirməyə öyrəşməyib. Bundan başqa, biz 6,5 saat yol gəlmişik. Bakıyla Braqa arasında dörd saat fərq də öz təsirini göstərir. Biz bilirik ki, necə çətin rəqib qarşı oynayacağıq. Əlbəttə ki, Portuqaliyaya qələbə dalınca gəlməmişik. Bunu futboldan başı çıxan adamlar yaxşı bilir. Sadəcə, bu cür qarşılaşmarda futbolçularımız müsbət təcrübə qazana bilərlər. Bu Azərbaycan futbolunun inkişafı üçün vacibdir. Komandamız sabah bütün gücüylə mübarizə aparacaq.

- Siz qeyd etdiniz ki, Portuqaliyaya qələbə üçün gəlməmisiniz. Amma nəzərə alaq ki, Azərbaycan millisi bütün seçmə mərhələlərdə qrupun favoritlərindən xal alıb. Bu mənada, komandanızdan sürpriz gözləməyə dəyər?

- Bu xalları biz ev oyunlarında qazanmışıq. Ona görə də sualınıza cavab verə bilməyəcəyəm.

- Komandanız Portuqaliya və Rusiyaya mane ola bilərmi?

- Mən düşünürəm ki, favoritlərə çox mane ola bilmərik. Bizim məqsədimiz «Avro-2016»nın final mərhələsinə düşməkdir.

- Portuqaliya ilə matçda start heyətində dəyişiklik olacaq, yoxsa İsraillə oyundakı ilk onbirliyi meydana buraxacaqsınız?- Mahir Şükürovun yüngül zədəsi, Vaqif Cavadovun qızdırması var. Ona görə də dəyişiklik ola bilər.

- Kamran Ağayevin klubsuz qalması onun durumuna necə təsir edib?

- Bu, böyük bir problemdir. Oyun təcrübəsi olmayanda futbolçu formadan düşür. Kamran yaxşı qapıçıdır. Təəssüflər olsun ki, futbol qaydalarına əsasən, 11 oyunçudan biri qapıçı olmadır.