'Hafiz Hacıyev: “Hüseyn Abdullayev bazar adamıdır və getsin alverini eləsin, onun siyasətdə nə işi var”

“Milli Şura “Satqınlar Şurası”dır. Bu Şurada hakimiyyətin hesabına var-dövlət qazanmış, milyonlara sahib olmuş ikiüzlü insanlar toplaşıb ki, onların nəinki hakimiyyətə gəlmək, heç seçkiyə qatılmaq imkanları belə yoxdur”.Bu sözləri Editor.az-a açıqlamasında Müasir Müsavat Partiyasının sədri Hafiz Hacıyev söyləyib.

Onun sözlərinə görə, Milli Şurada təmsil olunan partiya sədrləri bilir ki, hakimiyyətə gələ bilməyəcəklər və qoca bir adamı qabağa verməklə, ikiüzlü satqınların cibinə girmək istəyirlər: “Bu adamlar həya hissini itirmiş, öz şəxsi mənafeləri naminə erməni dəyirmanına su tökməyə belə hazır simasızlardır. Biz neçə illər deyirdik ki, hakimiyyət daxilindəki satqınlara öz yerini göstərmək lazımdır. Bizə qulaq asmadılar və nəticə göz qabağındadır. Hüseyn Abdullayev kimdir ki, iqtidarı ittiham etsin?! O bazar adamıdır və getsin alverini eləsin, onun siyasətdə nə işi var. Gör Azərbaycan müxalifəti nə günə qalıb ki, “Quska”ya ümid edir. Bir adamın ki, adı “Quska” ola, ondan nə siyasətçi olacaq?! Bu adam hakimiyyətin hesabına varlanan biznesmendir. Bu iqtidarın hesabına milyonçu olub. İndi bir balaca maraqlarına toxunublar deyə, dönüb olub qatı müxalifətçi. Hər kəs bilsin və agah olsun ki, nə qədər ki, Hafiz Hacıyev və Müasir Müsavat Partiyası meydandadır, heç kim Azərbaycanda daxili sabitliyi poza və İlham Əliyevə qarşı çirkin niyyətlərini həyata keçirə bilməyəcək”.