Bir testlə sürətlə qocalan orqanlar müəyyən edilə bilər

AZXEBER.COM xarici mediaya istinadən xəbər verir ki, ABŞ-nin Stanford Universitetinin tədqiqatçıları qan analizi ilə 11 orqan və toxumada olan zülalları tədqiq edərək, onların sürətlə qocalıb-yaşlanmadığını müəyyən etmək mümkün olduğunu ortaya qoyub.

Stanford Universitetinin xəbərinə görə, tədqiqatçılar təxminən 5700 böyüklər üzərində qan testləri keçirib və beyin, ürək, ağciyər, qaraciyər, bağırsaq, böyrək, qan damarları, immun sistemi, əzələlər, mədəaltı vəzi və yağ toxuması da daxil olmaqla 11 mühüm orqan və toxumada yüzlərlə zülalları araşdırıblar.

Orqanların tez və ya yavaş yaşlanmasını araşdıran tədqiqatçılar qan testləri ilə sürətlə qocalan orqanların aşkar edilməsinin mümkün xəstəliklərin kliniki simptomları görünməzdən əvvəl müalicəyə istiqamət verə biləcəyini ifadə ediblər.

Orqanları yaşıdlarına nisbətən daha tez qocalmış insanlarda xəstəlik riskinin daha yüksək olduğunu qeyd edən tədqiqatçılar 50 və daha yuxarı yaşda olan hər 5 nəfərdən birinin ən azı bir orqanının sürətlə qocaldığına diqqət çəkiblər.

 

Araşdırma "Nature" jurnalında dərc olunub.