Müəllif: Məltəm Rüstəmova
Göygöl rayon Uşaq və Ailələrə Dəstək Mərkəzinin əməkdaşı
Son illər dünyada baş verən hadisələr göstərir ki, münaqişələr və gərginlik ocaqları qlobal sabitlik üçün ciddi təhlükə yaradır. Bir çox regionlarda uzunmüddətli münaqişələr hələ də davam edir, yeni qarşıdurma nöqtələri formalaşır və beynəlxalq münasibətlər sistemi sınaq qarşısında qalır. Belə bir şəraitdə sülhün əldə olunması təkcə regionlar üçün deyil, bütövlükdə dünya üçün böyük əhəmiyyət daşıyır.
XIII Qlobal Bakı Forumunda çıxış edən Azərbaycan Respublikasının Prezidenti cənab İlham Əliyev də məhz bu məqamı xüsusi vurğulayaraq sülhün əhəmiyyətindən danışıb. Dövlət başçısı bildirib ki, sülhə nail olmaq asan proses deyil. Dünyada uzun illər davam edən münaqişələr fonunda Azərbaycan və Ermənistan arasında sülhün əldə olunması diqqət çəkən bir nümunədir. Prezident qeyd edib ki, 2023-cü ilin sentyabrında baş verən son qanlı toqquşmadan sonra 2025-ci ilin avqustunda sülhün əldə olunması cəmi iki ilə yaxın bir müddət ərzində mümkün olub. Bu isə normallaşma prosesinin olduqca sürətli getdiyini göstərir.
Bu nəticənin əldə olunmasında əsas amillərdən biri güclü siyasi iradə və müharibənin sonsuza qədər davam edə bilməyəcəyinin dərk olunmasıdır. Sülhə aparan yol hər iki tərəfin qəbul etdiyi qərar nəticəsində mümkün olub. Hazırda artıq bir neçə aydır ki, region sülh şəraitində yaşayır və bunun müsbət təsirləri tədricən hiss olunmağa başlayır.
Prezident İlham Əliyevin də vurğuladığı kimi, sülhün üstünlükləri artıq görünməkdədir. Sülh yalnız silahların susması demək deyil. Bu, eyni zamanda sabitlik, iqtisadi inkişaf, regionda əməkdaşlıq imkanlarının genişlənməsi və insanların daha təhlükəsiz gələcək qurmaq imkanının yaranması deməkdir.
Eyni zamanda dünya miqyasında baş verən proseslər göstərir ki, beynəlxalq hüquqa hörmət və beynəlxalq təşkilatların qəbul etdiyi qərarların icrası qlobal sabitliyin qorunması üçün vacibdir. Əgər beynəlxalq hüquq normaları nəzərə alınmazsa, ölkələrin ərazi bütövlüyü pozulur və yeni münaqişələr üçün zəmin yaranır.
Bu baxımdan Azərbaycan nümunəsi göstərir ki, siyasi iradə, qarşılıqlı anlaşma və sülhə yönəlmiş yanaşma ən mürəkkəb münaqişələrin belə həllinə yol aça bilər. Sülhün təmin olunması isə yalnız region üçün deyil, gələcək nəsillərin təhlükəsiz və sabit mühitdə yaşaması üçün də mühüm əhəmiyyət kəsb edir.
Bu gün artıq aydın görünür ki, sülh təkcə siyasi qərar deyil, həm də inkişafın, sabitliyin və gələcəyə inamın əsas təminatıdır. Çünki həqiqətən də sülhdən daha yaxşı alternativ yoxdur.
