Xəbər verdiyimiz kimi, ötən gün Tovuzda 5 nəfər, Şəmkirdə 24 nəfər dönərdən zəhərlənib.
Bəs bu qidadan zəhərlənmə halları niyə məhz rayonlarda və ya Bakı ətrafı qəsəbələrdə, ərazilərdə baş verir?
Məgər bu ətlə, toyuqla dönər satan iaşə obyektləri yoxlanılmır və ya cərimə edilmir?
Məsələ ilə bağlı AQTA-dan AZXEBER.COM-a bildirilib ki, mətbuatda yayılan xəbərlər həqiqəti tam əks etdirmir:
"Belə ki, Tovuz rayonunda zəhərlənmə halı olmayıb. Şəmkirdə 24 nəfər dönərdən zəhərlənib, onların arasında 4 nəfər Tovuz sakini olub”.
AQTA həmçinin dönərin hansı halda təhlükəli ola biləcəyini də açıqlayıb:
"İlk növbədə dönər üçün istifadə olunan ət mütləq baytarlıq-sanitariya ekspertizasından keçirilməlidir. Dondurulmuş çiy dönərin donunun açıldığı andan bişirilməyə başlanmasına qədər olan müddət ərzində məhsulun saxlanması və daşınması +1°C ilə +4°C temperatur intervalında həyata keçirilməli və bu müddət ümumilikdə 8 saatdan artıq olmamalıdır. Qida məhsullarının hazırlanması, saxlanması və təqdimatı zamanı sanitar-gigiyenik normalara riayət edilməli, xüsusilə temperatur rejiminin qorunması təmin olunmalıdır. Qida bloku təmiz saxlanmalı, avadanlıqlar mütəmadi olaraq yuyulmalı və dezinfeksiya edilməlidir. Bunun üçün çiy və bişmiş məhsulların hazırlanma sahələri ayrılmalı, istifadə olunan alətlər və iş səthləri fərqləndirilməlidir. İşçi heyətin mütəmadi tibbi müayinələrdən keçməsi və şəxsi gigiyena qaydalarına əməl etməsi təmin edilməlidir. Satış zamanı bişmiş dönərin temperaturu 65°С-dən aşağı olmamalıdır. Dönərlə birlikdə təqdim olunan sousların, mayonezin və tərəvəzlərin saxlanma rejiminə ciddi nəzarət edilməlidir. Çiy dönər bişirilməyə başlandığı andan etibarən 12 saat ərzində istifadə edilməlidir”.
Agentlikdən eyni zamanda dönər alarkən nələrə diqqət yetirilməsini də deyilib:
"Dönəri alarkən onu satan obyektin qida təhlükəsizliyi qeydiyyatından keçirilməsinə, sanitar-gigiyenik vəziyyətinə, baytarlıq şəhadətnaməsinin olmasına, satan şəxsin gigiyenik qaydalara əməl etməsinə, təmizliyə və. s fikir verilməlidir”.
Mikayıl Mirzəzadə
