Braziliyada prezident, ştat qubernatorları və parlamentin hər iki palatasının üzvlərinin müəyyənləşəcəyi ümumi seçkilərin ilk turu keçirilir.
Ölkənin Ali Seçki Məhkəməsi prezident postuna 12 namizədi qeydə alıb.
Seçkilərin nəticələrinə əsasən, Braziliyanın növbəti dörd il üçün prezidenti müəyyənləşəcək. Həmçinin ştatların və Federal Dairənin qubernatorları seçiləcək, Deputatlar Palatasının tərkibi tam yenilənəcək, Federal Senatın isə üçdə biri seçiləcək. Bundan əlavə, regional qanunverici orqanlara deputatlar seçiləcək.
Prezident, qubernator və senatorlar majoritar, federal və regional deputatlar isə proporsional sistem üzrə seçilir. İcra hakimiyyəti vəzifələrinə namizədlərdən heç biri ilk turda səslərin mütləq əksəriyyətini qazana bilməsə, oktyabrın 25-də ikinci tur keçiriləcək.
Ali Seçki Məhkəməsinin məlumatına görə, seçkilərdə 158 milyon 745 min 502 vətəndaşın səsvermə hüququ var. Səsvermə 18-69 yaş arasında savadlı vətəndaşlar üçün məcburidir. Savadsız vətəndaşlar, 16-17 yaşlı şəxslər və 70 yaşdan yuxarı vətəndaşlar üçün səsvermə könüllüdür.
Səsvermə yerli vaxtla saat 08:00-dan 17:00-dək keçiriləcək. Elektron səsvermə sistemi sayəsində ilkin nəticələrin məntəqələr bağlandıqdan qısa müddət sonra açıqlanacağı, yekun hesablamanın isə adətən bir neçə saat ərzində başa çatdığı bildirilir.
///teleqraf///
