"BakuBus” MMC sərnişin məmnuniyyətini artırmaq məqsədilə avtobuslarda internetə qoşulma imkanının yaradılması istiqamətində davamlı işlər aparır.
AZXEBER.COM xəbər verir ki, bu barədə Modern.az-a "BakuBus"-ın İctimaiyyətlə Əlaqələr şöbəsinin rəhbəri Əsmər Əliyeva məlumat verib.
O bildirib ki, sərnişinlər üçün əlavə xidmət kimi təklif olunan Wi-Fi imkanının həyata keçirilməsi həm texniki, həm də maliyyə baxımından müəyyən çətinliklər yaradır:
"Buna görə layihənin iqtisadi cəhətdən əsaslandırılması, maliyyə mənbələrinin müəyyənləşdirilməsi və ən optimal texniki həllərin seçilməsi zəruridir. Hazırda bu istiqamətdə müvafiq müzakirələr aparılır və nəticələrə uyğun addımlar atılacaq”.
Ə.Əliyeva onu da qeyd edib ki, artıq BakuBus-un hava limanı istiqamətində fəaliyyət göstərən H1 ekspress marşrut xəttində sərnişinlər ödənişsiz Wi-Fi xidmətindən istifadə edə bilərlər. Bu xətt 24/7 fasiləsiz fəaliyyət göstərir.
Bundan əlavə, qurum rəsmisi məlumat verib ki, 2025-ci il ərzində mərhələli şəkildə şəhərlərarası marşrut xətlərində də ödənişsiz Wi-Fi xidmətinin təmin olunması planlaşdırılır.
