Gündəlik həyatda sağlam hesab edilən bəzi içkilər əslində düşündüyünüz qədər faydalı olmaya bilər. Mütəxəssislər xəbərdarlıq edirlər ki, tərkibində yüksək miqdarda şəkər, süni dadlandırıcılar və müxtəlif əlavələr olan bəzi məhsulların həddindən artıq istehlakı sağlamlığa mənfi təsir göstərə bilər.
Qazlı və şəkərli içkilər də sağlamlıq üçün risk yaradan məhsullar sırasındadır. Həkimlərin sözlərinə görə, bu içkilərin müntəzəm qəbulu artıq çəki, piylənmə, 2-ci tip diabet və diş problemlərinin yaranma riskini artıra bilər.
Enerji içkiləri isə xüsusilə gənclər arasında geniş yayılsa da tərkibində yüksək miqdarda kofein və şəkər olduğuna görə ürək döyüntüsünün sürətlənməsi, yuxusuzluq və qan təzyiqinin yüksəlməsi kimi problemlərə səbəb ola bilər. Kardioloqlar bu məhsulların tez-tez qəbul edilməsini tövsiyə etmirlər.
Mütəxəssislər idman içkilərinin də yalnız intensiv fiziki fəaliyyət zamanı faydalı olduğunu bildirirlər. Gündəlik həyat tərzi keçirən insanların bu içkilərdən müntəzəm istifadə etməsinə ehtiyac yoxdur. Əks halda, əlavə şəkər və kalori qəbulu arta bilər.
Dietoloqlar həmçinin müxtəlif "detoks” və "fitnes” adı ilə satılan içkilərə qarşı da ehtiyatlı olmağı tövsiyə edirlər. Onların bəzilərinin faydası elmi araşdırmalarla tam təsdiqlənməyib və sağlam qidalanmanın əvəzi hesab edilmir.
/sfera.az
