Xırdalan şəhəri 1 nömrəli tam orta məktəbində 4-cü siniflərin buraxılışı ilə əlaqədar keçirilmiş tədbirdə şagirdlərin müəllimlərinə qızıl üzük və sırğa hədiyyə edilib.
Həmçinin Xırdalan şəhər 9 nömrəli məktəbdə Əlifba bayramı ilə bağlı tədbirdə də müəllimə qızıl qolbaq hədiyyə edilib.
Sosial şəbəkələrdə valideynin 4-cü siniflərin buraxılış tədbirində müəllimə qızıl dəsti taxmasının görüntüləri müzakirələrə səbəb olub. Xırdalan şəhəri 1 nömrəli tam orta məktəbində 4-cü siniflərin buraxılışı ilə əlaqədar keçirilmiş tədbirdə çəkilmiş video görüntülərlə bağlı Abşeron-Xızı Regional Təhsil İdarəsi bildirib ki, müəllim nüfuzuna xələl gətirən davranışını qınayır və belə halların yolverilməz olduğunu bir daha vurğulayırıq, hadisə ilə bağlı araşdırma başladıldığını qeyd edirik.
Bəs müəllimlərə bu cür hədiyyələrin bağışlanması nə dərəcədə doğrudur. Belə hadisələrin səbəbkarı kimdir?
Mövzu ilə bağlı təhsil eksperti Kamran Əsədov AZXEBER.COM açıqlama verib.
O bildirib ki, hazırda ölkənin 4432 orta təhsil məktəbində 1,6 milyon şagird var:
"Bizim şagirdlərimizin təlim-tərbiyəsi ilə 150 minə yaxın müəllim məşğul olur. Etiraf edək ki, son 3 il ərzində Azərbaycan təhsilində ciddi geriləmələr müşahidə olunur. Təhsilin idarə olunması, qiymətləndirilməsi ilə bağlı biz ciddi problemlər görürük. Məktəb-müəllim, şagird-müəllim münasibətləri son 3 il ərzində çox ciddi şəkildə geriyə doğru gedib. Buraxılış imtahanlarının nəticələrində də bu zəifləməni müşahidə edirik. Təbii ki, Azərbaycan təhsil sistemində ən ciddi problem kimi biz son dövrlər bir çox məqamları görə bilirik. Onlar arasında pul, qiymətli zinət əşyaları tələb etmə ciddi narahatlıq yaradan, ictimai qınağa səbəb olan hallar var.
Xüsusən son iki fakt müəllimin etik davranış qaydaları üçün çox xoşagəlməz mənzərdədir. Təəssüf ki, valideyn komitələri adı altında Whatsapp qruplarında fəaliyyət göstərən birliklərin davranışlarından xəbərdarıq. Onlar bəzən müəllimin xəbəri olmadan, müəllimə özlərini daha yaxşı göstərmək üçün valideynlər arasında pul yığırlar. Belə vəziyyəti yaradan bizim valideynlərimizdir”.
Kamran Əsədov qeyd edib ki, müəllim tələb etməz ki, mənə qızıl alın:
"Sözsüz ki, müəllimlərimiz arasında da öz vəzifə öhdəliklərini yerinə yetirməyənlər var. Repititor kimi yanına gəlməyənlərə psixoloji təzyiq göstərənlər var. Ancaq bu iki fakt onu göstərir ki, dörd il valideynlər övladlarına dərs deyən müəllimə bir formada təşəkkür etməyi planlaşdırıblar. Qeyd etdiyim kimi burda valideyn təşəbbüs var. Haqlı olaraq cəmiyyətdə narahatlığa səbəb olub. Tövsiyə edirik ki, bu tipli hadisələrə yol verilməsin. Müəllim nüfuzunu kəskin şəkildə aşağı salan haldır. Təhsil sistemində təyinatlar obyektiv həyata keçirilmir. Azərbaycan müəllimi ən yüksək imtizaya layıqdir”.
Kamran Əsədov hesab edir ki, bu hadisədə günahkar olaraq müəllimi görmək etik və doğru olmaz:
"Müəllimlərin əmək haqlarını artırmalıyıq, onların sosial vəziyyətlərini daha da yaxşılaşdırmalıyıq. Təbii ki, müəllim adı üçün hər iki videoda görünənlər xoş olmayan mənzərədir. Sanki boynu büküb dayanıb. Bu yaxşı hal deyil. Müəllim ələ baxan olmamalıdır. Fikrimcə, bu məktəb tərəfindən deyil, valideynlərin təşəbbüsüdür. Ancaq məktəblərdə də pul yığma kimi qanunsuz hallar var”,- deyə təhsil eksperti vurğulayıb.
Şəbnəm Zahir
