Martın 3-də Yevlaxda İqtisadiyyat, Gənclər və İdman nazirliklərinin, Azərbaycan Respublikasının Prezidenti yanında Gənclər Fondunun, "ASAN xidmət"in, Sahibkarlar (İşəgötürənlər) Təşkilatları Milli Konfederasiyasının nümayəndələri, biznes inkubator iştirakçıları, ətraf şəhər və rayonlarda fəaliyyət göstərən təşəbbüskar gənclərin iştirakı ilə "Biznes inkubatorların gənc sahibkarlığın inkişafında rolu" mövzusunda tədbir keçirilib.

Tədbirin keçirilməsində əsas məqsəd gənclərin biznes quruculuğuna təşviq edilməsi olsa da, tədbirdə daha çox Yevlax Rayon İcra Hakimiyyətinin işçilərinin girişinə icazə verilib.

Bu barədə AZXEBER.COM-a tədbirdə iştirak etmək istəyən, ancaq heç bir səbəb göstərilmədən zala buraxılmayan Vasif Abdullayev adlı oxucu məlumat verib.

O, tədbirdə iştirak etmək üçün Yevlax Rayon İcra Hakimiyyətinin başçısının müavini Vaqif Mehdiyevlə əlaqə saxlayaraq tədbirdə bir gənc olaraq iştirak etmək niyyətinin olduğunu bildirsə də, ona mənfi cavab verilib:

"Bu tədbir haqda iqtisadiyyat nazirliyinin saytında yazılan informasiyada qeyd edilib ki, regionda bu sahədə təşəbbüskar gənclərin iştirak ediblər. Lakin Ucar rayonundan layihəyə konkret olaraq yalnız icra hakimiyyəti əməkdaşları və idarə, müəsissə işçiləri göndərilib. Dövlət qulluqçusunun biznes inkubatorunda nə işi var axı? Bu haqda Yevlax rayon icra başçısının müavini Vaqif Mehdiyevlə telefon əlaqəsi saxlayıb sual verdim ki, layihə haqqında maraqlanıram. Dedilər ki, yaxınlaşın Yevlax şəhərində yerləşən Regional İnkişaf Mərkəzinə əgər sizə maraqlıdısa sizi istiqamətləndirək. Ancaq sonra heç bir şey etmədilər. Maraqlıdır, bəs bu dövlət qulluqçularının orada iştirak etməsini kim təşkil edib, onlar iş vaxtı biznes inkubatorunda nə gəzirlər. Xalq üçün nəzərdə tutulan layihələrdə dövlət qulluqçularının nə işi var?”.

Şikayətçinin sözlərinə görə, gənclər üçün nəzərdə tutulan tədbirdə sadəcə icra hakimiyyətinin işçiləri və onlara yaxın şəxslər buraxılıb.

Qeyd edək ki, nazirlik rəsmiləri və dövlət rəsmiləri də iştirak ediblər.