Azərbaycan bu mötəbər tədbirdə Milli Məclisin deputatları - AMEA-nın vitse-prezidenti, professor İsa Həbibbəyli, fəlsəfə doktoru Cavanşir Feyziyev və Sevinc Hüseynova, Azərbaycan İqtisad Universitetinin rektoru, professor Ədalət Muradov, AMEA-nın müxbir üzvü Möhsün Nağısoy, AMEA Arxeologiya və Etnoqrafiya İnstitutunun əməkdaşı Tahir Şahbazov və Azərbaycan Respublikasının Qazaxıstandakı səfiri Rəşad Məmmədovla təmsil olunub.
Bu barədə AZXEBER.COM-a nümayəndə heyətinin üzvü, tarix üzrə fəlsəfə doktoru Tahir Şahbazov məlumat verib. Onun sözlərinə görə, Forumda “Avrasiya məkanında əməkdaşlıq və inteqrasiya: müasir yanaşmanın yolları”, “Yeni dövrdə türkologiya, metodoloji yanaşmalar, müasir texnologiyalar və elmlərarası aspektlər”, “Müasir etnomədəni inteqrasiya kontekstində türk mirası”, “Böyük çöl sivilizasiyası və insanlığın formalaşması” və başqa mövzular ətrafında müzakirələr keçirildi.
Forumun I panelində Azərbaycan nümayəndə heyəti üzvlərindən Cavanşir Feyziyev və Ədalət Muradov məruzə ilə çıxış etdilər. AMEA-nın vitse-prezidenti, Ədəbiyyat İnstitutunun direktoru İsa Həbibbəylinin moderatorluq etdiyi III paneldə isə 1926-cı ildə Bakıda keçirilmiş I Türkoloji qurultayının türk xalqlarının tarixində oynadığı əvəzsis roldan, həmçinin müasir dövrdə türk xalqlarının inteqrasiyasının müxtəlif problemlərindən də danışıldı. Bu məsələlərlə bağlı Azərbaycandan AMEA-nın müxbir üzvü, AMEA Dilçilik İnstitutunun direktoru Möhsün Nağısoy məruzə ilə çıxış etdi.
Tahir Şahbazov onu da bildirdi ki, Forumun gedişində Azərbaycan Respublikasının Qazaxstan Respublikasındakı fövqəladə və Səlahiyyətli səfiri Rəşad Məmmədov görkəmli qazax yazıçısı, Azərbaycanın böyük dostu Oljas Süleymenovun 80 illik yubileyi münasibəti ilə Azərbaycan Respublikasının Prezidenti İlham Əliyevin ona ünvanladığı təbrik məktubunu oxudu və sonra Forum iştirakçılarının alqışları altında Fəxri diplomu yazıçıya təqdim etdi. Mayın 24-də isə Lev Qumilyov adına Milli Avrasiya Universitetində fəlsəfə üzrə fəlsəfə doktoru Cavanşir Feyziyevin Beynəlxalq Türk Akademiyası tərəfindən qazax dilinə tərcümə edilmiş “Türk Dövlətləri Birliyi: Qlobal inteqrasiyanın Avrasiya modeli” kitabının təqdimatı keçirildi. Mayın 24-də həmçinin Forum iştirakçılarının Qazaxstan Respublikasının Milli və Hərbi-Tarix Muzeylərinə, o cümlədən Beynəlxalq Türk Akademiyasının qərargahına ekskursiyası da təşkil olundu. Forum BTA ilə Beynəlxalq İqtisadi Əməkdaşlıq Təşkilatı arasında birgə memorandiumun imzalanması ilə öz işini yekunlaşdırdı.
