Xəbər verdiyimiz kimi, Azərbaycan Xarici İşlər Nazirliyi (XİN) Ermənistanın "humanitar yük” adı ilə konvoylar göndərməsinin Azərbaycanın ərazi bütövlüyünə qəsd olduğunu açıqlayıb.
Bildirilib ki, "Laçın" sərhəd-buraxılış məntəqəsinin mövcudluğunu həzm edə bilməyən Ermənistan tərəfinin ölkəmiz ilə razılaşdırmadan Azərbaycanın suveren ərazilərinə "humanitar yük” adı altında avtomobil konvoylarını göndərməsi Azərbaycanın ərazi bütövlüyü və suverenliyinə qəsddir, "Laçın" sərhəd-buraxılış məntəqəsinə qarşı növbəti təxribatdır.
Bəs, Ermənistan "Laçın" sərhəd-buraxılış məntəqəsinə qarşı təxribat törətməklə nəyə nail olmağa çalışır?
Mövzu ilə bağlı AZXEBER.COM-a danışan Milli Məclisin deputatı Anar İsgəndərov Azərbaycanın öz ərazi bütövlüyünü, suverenliyini qorumaq üçün hər şeyə hazır olduğunu bildirib:
"Ermənilər 44 günlük müharibədə darmadağın edildi. Erməni xislətini tanıyanlar bilirlər ki, erməni təslim olmayacaq. Göz yaşını tökəcək, dünyanı köməyə çağıracaq. Dünyanın ədalətli dövlətləri bu göz yaşlarına fikir verməyəcək, ancaq eyni düşüncədə olanlar erməni lobbisinə aldanaraq, onu müdafiə edəcək. Ermənistan dövlət səviyyəsində bəyan edir ki, Qarabağ Azərbaycan torpağıdır. Qarabağ Azərbaycan torpağıdırsa, orda yaşayanlar da Azərbaycan vətəndaşlarıdır. Onların qayğısına qalan da Azərbaycan dövləti olmalıdır. Azərbaycanda kimlər yaşayırsa, qanun qarşısında bərabərdir.
Azərbaycan təklif irəli sürür, əgər sən doğrusansa, niyə Qarabağa yardımın Ağdamdan gəlməsi ilə razılaşmırsan? Tarix boyu Xankəndinə gedən yol Ağdamdan olub. Bu yolu hamı bilir. Azərbaycanlı da bilir, erməni də, sülhməramlı da bilir”.
Millət vəkili hesab edir ki, Ermənistan guya Qarabağdakı ermənilərin humanitar fəlakət yaşadığını dünyaya yaymaq üçün israr edir:
"Laçın sərhəd-buraxlış məntəqəsinə gəlib, yığışıblar. Yığışsınlar, heç kimin onlardan qorxusu yoxdur. 2020-ci ilin 44 günlük Vətən müharibəsində Ali Baş Komadanın rəhbərliyi ilə xalqın, ordunun nəyə qadir olduğunu hamı bilir. Erməni yalandan hay-küy qaldırırsa, qaldırsın. Kimə yalvarırsa, yalvarsın. Azərbaycan erməni xislətinə çoxdan bələddir. Dövlət başçısının dediyi kimi Ermənistan bizimlə qonşuluq münasibətləri yaratmağa məcburdur. Qarabağda yaşayanlar bizim vətəndaşlarımızdır. Lakin onlar separtaçı mövqeydə çıxış edilərsə, Azərbaycan qanunlarını qəbul etmək istəmirlərsə, o zaman biz onlarla hüququn, ədalətin dili ilə danışacağıq. Qarabağdakı ermənilər guya humanitar fəlakət yaşayır. Əgər humanitar fəlakət varsa, niyə Ağdam yolundan gəlmirsiniz? Deməli hamısı yalandır, böhtandır. Sadəcə olaraq bölgədəki vəziyyəti qızışdırmaq istəyirlər. Ancaq onlar istəklərinə nail olmayacaqlar, bölgədəki vəziyyəti Azərbaycan diktə edir”.
Şəbnəm Zahir
