“Cəmil Həsənli yaxşı tarixçi, alim ola bilər amma o, siyasətçi deyil və bu səbəbdən prezidentlik iddiası gülüş doğurur.”
Bu sözləri AZXEBER.COM-a açıqlamasında Azərbaycan Gənclərinin Avropaya İnteqrasiyası Təşkilatının (AGAT) sədri Gülsel Səfərova söyləyib.
Onun sözlərinə görə, Cəmil Həsənlinin gənclərlə dünənki görüşünə qatılan insanların sayını şişirməklə Milli Şura heç nəyə nail ola bilməyəcək: “Bu ilk seçki deyil ki, ənənəvi müxalifət düşərgəsi ölkə gəncliyindən dəstək aldığını iddia edir. Sosial şəbəkələrdə minlərlə gəncin dəstəyini qazandığını iddia edən müxalifətçilərin real aksiyasına heç 100 gənc belə qatılmır. O səbəbdən ki, ölkə gəncliyinin seçkilərlə bağlı aydın mövqeyi ortadadır. Gənclərimiz ölkədə həyata keçirilən islahatları dəstəkləyir və bu islahatların iştirakçısına çevrilib.
“Azərbaycan Gəncliyi: 2011-2015-ci illərdə” Dövlət Proqramının qəbulu, gənclərin təhsil almaq və karyera qurmaq imkanlarının mövcud olması, dövlət idarəçiliyində gənc kadrların önə çəkilməsi bunun bariz nümunəsidir. Məhz bu səbəbdən də Azərbaycan gəncliyi onun inkişafına şərait yaradan, fəaliyyətini stimullaşdıran siyasi kursa, Heydər Əliyev siyasi kursuna və onun layiqli davamçısı cənab İlham Əliyevə dəstək verir. Bu il Azərbaycanda ilk dəfə olaraq 600 mindən artıq gənc seçkilərə qatılacaq və ölkə gəncliyi bütövlükdə mövcud iqtidara etimad göstərəcək. O ki qaldı Cəmil Həsənlinin gənclərlə görüşü ətrafında yaradılan süni ajiotaja, seçkisonrası radikal müxalifət düşərgəsində təmsil olunan qüvvələr də Azərbaycan gəncliyinin kimin yanında olduğunu aydın görəcək.”
AZXEBER.COM
