Azərbaycanın Cenevrə şəhərində BMT bölməsi və digər beynəlxalq təşkilatlar yanında Daimi Nümayəndəliyi ümummilli lideri Heydər Əliyevin anadan olmasının 90 illik yubileyi münasibətilə rəsmi qəbul təşkil edib.
AZXEBER.COM-un XİN-in mətbuat xidmətinə istinadən verdiyi xəbərə görə, tədbirdə BMT-nin Cenevrə bölməsinin baş direktoru K.Tokayev, İnsan Hüquqları Şurasının prezidenti R.Henczel, Parlamentlərarası İttifaqın baş katibi A.Conson, Beynəlxalq Mülki Müdafiə Təşkilatının baş katibi N.Al-Sleybi, BMT-nin Katibliyi, digər beynəlxalq təşkilatların rəhbər şəxsləri və əməkdaşları, diplomatik heyətin üzvləri, Cenevrə Kantonu Şurasının yüksək vəzifəli şəxsləri, KİV nümayəndələri və bu ölkədə təhsil alan azərbaycanlı tələbələr və diaspora nümayəndələri iştirak edib.Açılış mərasimində çıxış edən Azərbaycanın Cenevrədə BMT bölməsi və digər beynəlxalq təşkilatlar yanında Daimi Nümayəndəsi, səfir Murad Nəcəfbəyli ilk növbədə ümummilli liderin həyat və fəaliyyəti haqqında tədbir iştirakçılarına ətraflı məlumat verib, dahi şəxsiyyətin respublikanın ali rəhbəri seçilməsindən başlayaraq daha sonra Sovet İttifaqının faktiki rəhbərlərindən birinə çevrilməsini əks etdirən məqamları diqqətə çatdırıb.Dağlıq Qarabağda münaqişə alovlananda, bunun da nəticəsi kimi ölkədə ciddi hakimiyyət böhranı yarananda Azərbaycana qayıdan və 1993-cü ildə xalqının təkidli tələb ilə yenidən respublikaya rəhbərlik edən ümummilli liderin xalq qarşısındakı əvəzsiz xidmətlərindən ətraflı bəhs edən səfir, siyasi sistemin, dövlətçilik ənənələrinin möhkəmləndirilməsi sayəsində Azərbaycanın uğurla inkişaf etməkdə olan ölkəyə çevrildiyini qeyd edib.Ermənistanın ölkəmizə qarşı hərbi təcavüzü və bunun nəticəsində ərazilərinin 20%-nin işğal edilməsi və Azərbaycanın Ermənistanla müharibə vəziyyətində olmasına baxmayaraq, ölkəmizin iqtisadi, siyasi, sosial və diplomatik sahələrdə əhəmiyyətli nailiyyətlər əldə etdiyini diqqətə çatdıran M.Nəcəfbəyli, bu nailiyyətlərin birbaşa Heydər Əliyevin adı ilə bağlı olduğunu vurğulayıb.Hazırda Prezident İlham Əliyev tərəfindən aparılan uğurlu islahatların ümummilli lider Heydər Əliyevin uzaqgörən siyasətinin məntiqi davamı olduğuna diqqəti yönəldən Daimi Nümayəndə, siyasi və iqtisadi islahatların ölkəmizdə davamlı inkişafı təmin etdiyini bildirib.Çıxışında Azərbaycan-BMT əlaqələri və bu xüsusda, ölkəmizin etibarlı tərəfdaş qismində 155 dövlətin dəstəyi sayəsində BMT Təhlükəsizlik Şurasının qeyri-daimi üzvü seçildiyini bildirən M.Nəcəfbəyli, ölkəmizin BMT sistemi çərçivəsində bütün sahələrdə əməkdaşlığını həyata keçirdiyini əlavə edib.Tədbir çərçivəsində ümummilli lider Heydər Əliyevin həyat və fəaliyyətinə həsr olunmuş film nümayiş olunub, dahi şəxsiyyətin müxtəlif sahələrdəki fəaliyyətinə dair kitab və məlumatlar tədbir iştirakçılarına paylanıb.
