“Ötən gün Yurddaş Partiyası beşinci qurultayında yekdilliklə Yeni Azərbaycan Partiyasının (YAP) namizədi, dövlət başçısı İlham Əliyevin namizədliyini dəstəkləmək haqqında qarar çıxarıb”. Bunu Yurddaş partiyasının sədri Mais Səfərli deyib.
Partiya sədrinin sözlərinə görə, Qurultayda 56 rayon təşkilatından 110 nümayəndə iştirak edib: “Burada oktyabrda keçiriləcək prezident seçkilərilə bağlı məsələ müzakirə olunub. Həmçinin Qurultay yekdilliklə Yeni Azərbaycan Partiyasının (YAP) namizədi, dövlət başçısı İlham Əliyevin namizədliyini dəstəkləmək haqqında qarar çıxarıb. Qurultayda hesab edildi ki, ölkə rəhbəri İlham Əliyev xalq qarşısında içdiyi anda tamamilə sadiq qalıb. O, Azərbaycan Respublikasının Prezidenti olaraq, ölkə Konstitusiyasına həmişə əməl edib. Eləcə də Azərbaycan dövlətinin müstəqilliyini, ərazi bütövlüyünü hər zaman qoruyub və xalqa ləyaqətlə xidmət edib. Bu illər ərzində İlham Əliyev özünün parlaq fəaliyyəti nəticəsində Azərbaycanı nəinki regionun, Şərqi Avropanın, bütövlükdə dünyanın ən inkişaf etmiş ölkələri sırasına gətirib çıxarıb. Həmin illərdə ölkəmiz, dövlət həyatının bütün sahələrində misli görünməyən inkişaf yolu keçib. Təbii ki, bütün bunlar Prezident İlham Əliyevin əvəzsiz xidmətləri nəticəsində mümkün olub. Azərbaycan bu gün dünyanın ən nüfuzlu dövlətləri sırasındadır. Bunun bariz nümunəsi kimi dövlətimizin BMT TŞ-nın qeyri-daimi üzv seçilməsini misal göstərə bilərik. Bildiyiniz kimi, Azərbaycanda ən mötəbər mədəniyyət, siyasət, beynəlxalq tədbirlər keçirilib. Bütün bunlar hamısı ondan xəbər verir ki, ölkəmiz bu gün hörmətə layiq, güvənli və inkişaf etmiş dövlətdir”.
Mais Səfərli bildirib ki, İlham Əliyev yenidən Azərbaycanda prezidentliyə ən güclü, layiqli namizəddir: “Qurultay ölkə başçısının seçki kampaniyasının aparılması üçün YAP-a dəstək olaraq, özünün seçki qərargahını yaradıb. Qərargahın sədri mən özüməm. Biz əlimizdən gələni edəcəyik ki, İlham Əliyevin gördüyü işlər barəsində xalqımıza, eləcə də dünya ictimaiyyətinə daha dolğun məlumatlar çatdıraq və prezidentin seçki qərargahına dəstək olaq”.
