‘Dağlıq Qarabağ probleminin həlli sonuna yaxınlaşmaq üzrədir’ - Baş nazirin müavini

Dağlıq Qarabağ probleminin həlli sonuna yaxınlaşmaq üzrədir. Trend xəbər verir ki, bunu jurnalstlərə açıqlamasında Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov bildirib. 31 avqust Qubadlı rayonunun işğal günü olduğunu xatırladan Baş nazirin müavini qeyd edib ki, Azərbaycanın Ermənistan tərəfindən işğal olunmuş əraziləri yaxın gələcəkdə azad ediləcək: "Biz çox təəssüf edirik ki, hələ ki, yalnız işğal günlərinə yığışıb toplaşırıq. Biz tam əminik ki, ölkə prezidenti cənab İlham Əliyevin rəhbərliyi altında yaxın gələcəkdə biz mütləq qələbə gününə yığışacağıq. Hesab edirik ki, gün gələcək bu torpaqlar azad olunacaq. Biz Qubadlı camaatı ilə Azərbaycanın dilbər güşələrinin birində - Qubadlıda mütləq görüşəcəyik. Baxmayaraq ki, Ermənistan öz qeyri-konstruktiv mövqeyi ilə bu problemin həllini uzadır, ancaq bu problemin sonu yaxınlaşmaq üzrədir. Ölkə Prezidenti necə ki, Azərbaycan dövlətini, xalqını, Azərbaycanı bütün dünyaya qısa müddətdə tanıdıb, bütün dünyanın maraq mərkəzinə çevirib, bu problemin də həllinə nail olacaq. Hesab edirik ki, ölkədə bu problemdən başqa ciddi problem qalmayıb. Yeganə problemimiz Ermənistan-Azərbaycan, Dağlıq Qarabağ münaqişəsidir və bu da öz həllini tapacaq." Ə. Həsənovun sözlərinə görə, Prezident İlham Əliyev ölkədə olan 1 milyon 200 min qaçqın və məcburi köçkünlərin həyat şəraitini tam təmin edib, onların bütün sosial problemləri öz həllini tapıb: "Bu gün dünyanın bütün münaqişə zonalarında ən yaxşı təminat Azərbaycan qaçqın və məcburi köçkünlərinə aiddir. Bunu BMT-nin qaçqınlar üzrə ali komissarı öz çıxışlarında dəfələrlə bəyan edib. Ötən il ərzində orta hesabla bir məcburi köçkünə 1350 ABŞ dollarına qədər vəsait sərf olunub. Son 20 ildə isə bu sahəyə 5,4 milyard dollar sərf olunub. Bunun 81%-i Prezident İlham Əliyevin ölkəyə başçılıq etdiyi dövrdə baş verib. Bu ilin sonunadək məcburi köçkünlər üçün tikilən bütün qəsəbələrin sayı 82-yə, köçürüləcək əhalinin sayı isə 180 min nəfərə və ya 35 minədək ailəyə çatacaq. Bütün bunların 91%-i son 10 il ərzində həyata keçirilib. Yəni bu qədər iləri görən Prezident mütləq bu torpaqların azad olunmasına nail olacaq. Biz də mütləq yaxın gələcəkdə sizlərlə həmin torpaqlarda görüşəcəyik."