Thorax jurnalında çap olunan araşdırmaya əsasən qanda dəmirin miqdarının az olması damarlarda qanın laxtalanma riskini xeyli artırır. Onlar belə qərara gəliblər ki, irsi damar xəstəliklərini zamanı qanda dəmirin miqdarını artırmaq xəstəliyin müalicəsinə əhəmiyyətli təsir edə bilər.

Böyük Britaniyada hər 1000 nəfərdən biri dərin venaların trombozu xəstəliyindən əziyyət çəkir. Bu xəstəlik ayaqlarda ağrı və şişkinlik ilə xarakterizə olunur. Tromb həmin venalardan qoparaq qan dövranına düşdükdə ölümlə nəticələnən ağciyər arteriyalarının tromboemboliyası baş verir.

London İmperial Kollecin bir qrup alimləri qanın yeni laxtalanma risk faktorlarını öyrənmək üçün irsi hemorragik telangiekteziya xəstələrini müayinə etmişlər. Bu xəstəlik qan damarlarının irsi xəstəliyidir və burundan, bağırsaqdan qanın axmasıyla müşahidə olunur.

“İndiyə kimi əksər laxtalanma səbəbləri qaranlıqdır” – deyənDr Klara Şovlin(Claire Shovlin) telangiekteziyalı xəstələrdə qanın laxtalanmasının öyrənilməsinin ümumi populyasiya üçün də keçərli olacağı fikrindədir.

Dr Şovlin və onun komandası 1999-2011 illərdə 609 xəstənin müayinəsi zamanı əksər xəstələrin qanında dəmirin səviyyəsinin az olduğunu müşahidə etmişlər. Dəmirin qanda azlığının əsas səbəbi uzun müddət ərzində xəstələrin az miqdarda daxili qanaxma ilə qan itirməsi olub. Mütəxəssislər belə qərara gəliblər ki, dəmirin azlığı qan laxtalarının əmələ gəlməsinə səbəb olur. Dəmir preparatları qəbul edən xəstələrdə bu risk az olmuşdur.