Millət vəkili Mahir Abbaszadə Diasporla İş üzrə Dövlət Komitəsinin yaradılmasının Azərbaycanın müstəqillik tarixindəki ən mühüm addımlardan biri olduğunu, müstəqillik əldə edəndən sonra xaricdə yaşayan soydaşlarımızın bir araya gətirilməsinin, Azərbaycan həqiqətlərinin dünya ictimaiyyətinə çatdırmasının ölkəmiz üçün prioritet təşkil edən məsələ olduğunu bildirib.
AZXEBER.COM xəbər verir ki, Mahir Abbaszadə Diasporla iş üzrə Dövlət Komitəsinin Ulu Öndər Heydər Əliyevin 5 iyul 2002-ci il tarixli fərmanı ilə yaradıldığını və əsas məqsədin xaricdə yaşayan azərbaycanlıların həmrəyliyinin təmin olunması, Azərbaycan üçün önəmli məsələlərin dünya ictimaiyyətinə çatdırılması olduğunu və Azərbaycan diasporunun bunun öhdəsindən layiqincə gəldiyini bildirib.
"Qarabağın qədim Azərbaycan torpağı olması, erməni işğalı nəticəsində bir milyondan artıq insanın qaçqın və məcburi köçkün vəziyyətinə düşməsi ilə bağlı həqiqətlərin beynəlxalq ictimaiyyətə çatdırılmasında Diasporla İş üzrə Dövlət Komitəsi xüsusi rol oynayıb. 44 günlük müharibə zamanı Diasporla İş üzrə Dövlət Komitəsinin tutduğu mövqe, xaricdə yaşayan azərbaycanlıları bir araya gətirməsi, diasporumuzun Azərbaycanın haqqlı mövqeyini müdafiə etməsi və dünyaya bəyan etməsi cənab prezidentin yürütdüyü siyasi xəttin davamı idi”-deyə deputat bildirib.
Müharibədən sonra Diasporla İş üzrə Dövlət Komitəsinin qarşısında duran hədəflərin dəyişdiyini bildirən Mahir Abbaszadə bir məqamı xüsusilə vurğulayıb: "Bu günə qədər diasporumuz işğal altında olan torpaqların geri qaytarılması ilə bağlı dünya ictimaiyyətinin diqqətini çəkirdi, artıq Diasporla İş üzrə Dövlət Komitəsi işğaldan azad olunmuş ərazilərdə yaşayış bərpa olunandan sonra beynəlxalq təşkilatların, dünyaya səpələnmiş azərbaycanlıların, Azərbaycan evlərinin nümayəndələrinin bu bölgələrə səfərlərinin təşkil edilməsində və bölgədəki inkişafın, yenidənqurmanın dünyaya çatdırmasında mühüm rol oynayacaq və mən inanıram ki, Komitə bunun öhdəsindən layiqincə gələcək”.
Deputat həmçinin əlavə edib ki, 2018-ci ildə Komitəyə Fuad Muradovun sədr təyin olunması Komitənin fəaliyyətində müsbət dəyişikliklərə ciddi təkan verib.
Komitə əməkdaşlarını təbrik edən Mahir Abbaszadə şərəfli və çətin yolda onlara uğurlar arzulayıb və işlərinin öhdəsindən layiqincə gələcəklərinə əminliyini ifadə edib.
