Müğənni Manaf Ağayev son günlər Qarabağda baş verən hadisələr zamanı müğənnilərin cəbhə bölgəsinə yollanmasına münasibət bildirib.
AZXEBER.COM-un məlumatına görə, BiG.AZ-a açıqlama verən sənətçi bildirib ki, bu dəqiqələrdə klip çəkdirmək yox, döyüşmək və cəbhədə olmaq lazımdır:
"Bu gün klip meydanı deyil, cəbhədə olmaq lazımdır. Əsgərlərimizin yanında durmaq, ruh vermək lazımdır. Oxuduğum ifalardan da hiss edərsiniz ki, mənim qədər Vətənə bağlı, torpağına, Qarabağa bağlı insan yoxdur. Bu günə qədər 10 albom buraxmışam, həmin albomlarda Qarabağla bağlı mahnılar yer alıb. Əgər elə olmasaydı, mən o albomları sındıraram. Qarabağlıyam və işğal olunmuş torpaqlarımızda göz açmışam. Müharibə olsa mən də gedərəm. Mən getməsəm, başqası niyə getməlidir ki?"
Bir çox müğənnilərin cəbhə bölgəsinə yollanmasının cəmiyyətdə, eləcə də sosial şəbəkələrdə birmənalı qarşılanmadı. M.Ağayevin bu məsələyə münasibəti isə belə oldu:
"O savadsız və xain adamların əməlidir. Belə məsəl var : getmirsən vay, gedirsən vay. Cəbhə bölgəsinə yollananda cibindən pul da xərcləyirsən, əziyyət də çəkirsən. Deyirlər ki, reklam xatirinə edirlər. Axı mən niyə bununla reklam olunmalıyam? Savadsız insanlar adamı ruhdan salır. Gəl, 5-10 manat verim səni də yollayım. Əgər "duxun çatırsa, sən də get, lağ eləmə. Müğənnilər cəbhə bölgəsinə yollanıb Vətən mahnılarını, Qarabağ şikəstəsini oxuyur. Bu da bir Azərbaycanın himnidir. Müğənnilər cəbhə bölgəsinə getməklə həm də şəhidlərin ruhunu şad edir".
Sənətçi Astaradan şəhid olan igid oğul Pəncəli Teymurovun məzarı üstə ifasından sonra onu tənqid edənlərə də cavab verdi:
"Pəncəlinin qardaşı mənə dedi ki, ay Vətən oğlu mahnısını sizin ifanızda çox bəyənirdi. Səsləndirsəniz, ruhu da şad olar. Mən də ifa etdim. Şəhidimizin xatirəsinə oxudum, başqa bir şey oxumadım ki? Şəhidin toyunda da iştirak etmişdim. O video ortaya çıxanda tüklərim biz-biz oldu. Amma şəhidin məzarı üstündə ifamdan sonra mənfi fikir bildirənlər də oldu. Biri yazır ki, camaat şəhid olur, Manaf orada oxuyur. Deyirlər ki, şəhid sənin balan olsun. Apardılar cəbhəyə döyüşməyə mən getmədim? Şəhidin məzarı üstündə ifa etməklə mən də bir ananı sevindirdim də. Bir ağız ifa etməklə nəyi reklam edəcəyəm? Reklamdır, sən də get. Cəbhə bölgəsinə gedəndə 3 min manat mən xərc çəkmişəm. Boş-boş danışırlar ki, reklam üçün etmişəm. Öz torpağıma getmək reklamdır? Reklam istəsəydim, elə 3 mini verib klip çəkdirərdim də".
