Avtomobillərin ödənişli parklanması üçün nəzərdə tutulan "AzParking" ərazisində həftəsonu ödəniş tələb edilməsə də bəzi sürücülər "parkovşik" kimi tanınan şəxslərlə mübahisə yaşayırlar.
Bəzi parklanma ərazilərində qanunsuz şəkildə ödəniş tələb edən şəxslərin ortaya çıxması adi hala çevrilib.
Məlumata görə, bazar günləri rəsmi olaraq ödənişsiz olan parklanma yerlərində "parkovşik"lər sürücülərdən nağd pul tələb edirlər. Bu şəxslər "AzParking" əməkdaşı olmadıqları halda, sürücüləri çaşdıraraq əsassız ödəniş almağa cəhd göstərirlər.
Qeyd edək ki, bu hal xüsusilə insanların daha sıx olduğu ərazilərdə müşahidə olunur və bir çox hallarda sürücülər qaydalardan xəbərsiz olduqları üçün ödəniş etməyə məcbur qalırlar.
Mövzu ilə bağlı DİN Mətbuat Xidmətinin əməkdaşı Cəsarət Qənbərli BAKU.WS-ə bildirib ki, parklanma qaydalarının tənzimlənməsi prosesində yaranan neqativ halların aradan qaldırılması üçün polis əməkdaşları tərəfindən sistemli mübarizə aparılır və qanunsuz fəaliyyətin qarşısı alınır:
"Ayrı-ayrı şəxslər tərəfindən avtomobil parklanması üçün qanunsuz şəkildə zəbt olunma hallarının qarşısının alınması diqqət mərkəzində saxlanılır. Polis əməkdaşlarının həyata keçirdikləri monitorinqlər və profilaktik tədbirlərlə səlahiyyəti olmadan parklanma yerlərini təşkil edən, parklanma xidməti göstərən yaxud həmin xidmətlə bağlı ödəniş tələb edən şəxslər müəyyən edilərək barələrində inzibati tənbeh tədbiri tətbiq olunur".
