Bu ildən ali təhsil müəssisələrinin məzunlarına diplomlar elektron formatda təqdim olunur.
Bununla da uzun illər məzunların yaddaşında xüsusi yer tutan ənənəvi kağız diplomlar tarixə qovuşur.
Kağız diplom bir çoxları üçün sadəcə təhsil sənədi deyil, həm də arasına qoyulan şirinliklər, çəkilən xatirə şəkilləri və ailə ilə bölüşülən sevinc vasitəsilə illərlə çəkilən zəhmətin, qazanılan uğurun və unudulmaz tələbəlik illərinin simvolu olub.
Elektron diplom sistemi sənədləşmə prosesini daha müasir, sürətli və əlçatan etsə də, bəzi məzunlar ənənəvi kağız diplomdan imtina etmək istəmir.
Bəs elektron diplom alan məzun sonradan onun kağız variantını əldə edə bilərmi?
Mövzu ilə bağlı AZXEBER.COM-a danışan təhsil eksperti Məzahir Məmmədli bildirib ki, elektron diplomlar artıq hər bir məzun üçün "myGov" platformasında əlçatan olacaq:
"Artıq bilirsiniz ki, sənədlərin elektron qaydada təqdim olunması ilə bağlı təşəbbüs həyata keçirilir. Elm və Təhsil Nazirliyinin müvafiq şöbəsinin müdiri də bu məsələ ilə bağlı son günlərdə mətbuata açıqlama verib. Hər kəs mobil tətbiq vasitəsilə "myGov"a daxil olaraq diplomunu elektron formada görə bilər".
Məzahir Məmmədli qeyd edib ki, məzunlar istədikləri halda diplomun kağız variantını da əldə edə bilərlər:
"Ənənəvi diplomun əldə olunmasına gəlincə, hər kəs istədiyi vaxt elektron diplomunu çap etdirərək kağız formatında özündə saxlaya bilər. Zəruri hallarda tələb olunan qurumlara təqdim etmək üçün diplomun kağız versiyasını istənilən vaxt çap etmək mümkündür. Bununla bağlı hər hansı məhdudiyyət və ya qadağa yoxdur. Bu praktika dünyanın bir çox ölkəsində uzun illərdir tətbiq edilir. Azərbaycanda isə layihəyə ötən ildən başlanılıb, bu ildən isə tam şəkildə tətbiq olunur. Ali təhsil müəssisəsini bitirmiş hər bir şəxsin diplomu avtomatik olaraq "myGov" mobil tətbiqinə yüklənir və o, heç bir quruma müraciət etmədən şəxsi hesabı vasitəsilə diplomunun kağız surətini çıxara bilər".
Fəridə Əsədzadə
