Ötən gün "Bioloji Təbabət” klinikasının qarşısında baş verən hadisə özəl tibb müəssisələrinin fəaliyyəti ilə bağlı sualları yenidən gündəmə gətirib.
Belə ki, Baku TV-nin çəkiliş qrupunun klinika rəhbəri tərəfindən hücuma məruz qaldığı, jurnalistlərə fiziki zor tətbiq edildiyi, çəkiliş avadanlığının zədələndiyi və operatorun xəsarət aldığı bildirilir.
Qeyd edək ki, son illər ölkədə özəl klinikalarla bağlı qalmaqallı hadisələrin sayı artıb. Müxtəlif tibb müəssisələrində qeydə alınan pasiyent ölümləri, uğursuz estetik əməliyyatlar, tibbi səhlənkarlıq iddiaları, etik normaların pozulması və digər hüquqi mübahisələr cəmiyyətdə geniş rezonans doğurub.
Bir tərəfdən özəl səhiyyə sektorunun inkişafı tibbi xidmətlərə əlçatanlığı artırsa da, digər tərəfdən vaxtaşırı gündəmə gələn bu cür hadisələr xidmət keyfiyyəti, həkim məsuliyyəti və dövlət nəzarətinin effektivliyi ilə bağlı sualları yenidən aktuallaşdırır.
AZXEBER.COM son illərdə ölkə gündəmində ən çox rezonans doğuran özəl klinika qalmaqallarını təqdim edir.
İki gün əvvəl Bakının Yasamal rayonunda yerləşən "Vital Hospital”da ölü doğulan körpənin meyitinin zirzəmiyə atıldığı iddiası sosial şəbəkələrdə böyük rezonans yaradıb. Səhiyyə Nazirliyi məsələ ilə bağlı araşdırmaya başlanıldığını və hüquq-mühafizə orqanlarının məlumatlandırıldığını açıqlayıb. Hazırda araşdırma davam edir.
Son günlər geniş müzakirə olunan digər hadisə fəaliyyəti dayandırılmış "UĞUR-777” estetik mərkəzi ilə bağlıdır. Sosial şəbəkələrdə yayılan görüntülərdə Gülbadə Abdullayevanın bir qadına qeyri-tibbi şəraitdə liposaksiya əməliyyatı etdiyi iddia olunur. Məlumatlara görə, əməliyyat əvvəlcədən tibbi müayinə aparılmadan həyata keçirilib. Qeyd edək ki, Gülbadə Abdullayevanın adı qanunsuz fəaliyyətlə bağlı iddialar səbəbindən daha əvvəl də dəfələrlə medianın gündəminə gəlib.
Bir müddət əvvəl isə "Yeni Klinika”da həyata keçirilən cərrahiyyə əməliyyatı pasiyentin ölümü ilə nəticələnmişdi. İş üzrə təqsirləndirilən həkim Sevinc Məmmədova məhkəmənin hökmü ilə 2 il 6 ay müddətinə azadlığın məhdudlaşdırılması cəzasına məhkum edilib. Həmçinin onun barəsində elektron nəzarət vasitəsinin tətbiqinə qərar verilib.
Qeyd edək ki, bu, "Yeni Klinika” ilə bağlı ictimai narazılıq doğuran yeganə hadisə olmayıb. Belə ki, klinikanın növbə sistemində yaranan problemlə bağlı yayılan görüntülərdə pasiyentin vəziyyətinin pisləşdiyi əks olunmuşdu. TƏBİB qadının dərhal müayinədən keçirildiyini və həyati təhlükəsinin olmadığını açıqlasa da, növbə sistemində yaranan problemin səbəbi barədə ətraflı məlumat verməmişdi.
"Baku Medical Plaza” ilə bağlı geniş müzakirələrə səbəb olan hadisələrdən biri də 5 aylıq körpənin ölümü idi. Ailə klinikanın əvvəlcə 2 500, daha sonra isə əlavə 10 min manat ödəniş tələb etdiyini iddia etmişdi. Klinikadan məsələ ilə bağlı izahat verilmiş, hadisə uzun müddət ictimai müzakirə mövzusu olmuşdu.
Sumqayıtda fəaliyyət göstərən "Real” Tibb Mərkəzi də pasiyent şikayəti ilə gündəmə gəlmişdi. İddiaya görə, mərkəzin doğum şöbəsinin müdiri, mama-ginekoloq Cavid Allahverdiyev pasiyentin başqa klinikada analiz verdiyini əsas gətirərək onu müayinə etməkdən imtina edib.
İctimai müzakirələrə səbəb olan digər hadisələrdən biri isə "Premium” Klinikası ilə bağlı idi. Xəstə yaxınlarından gecələməyə görə ödəniş alınması narazılıq doğurmuşdu. Klinikadan bunun göstərilən xidmətə görə qanuni ödəniş olduğu bildirilib. Səhiyyə Nazirliyi isə özəl tibb müəssisələrinin bu kimi xidmət haqlarını qanunvericiliyə uyğun olaraq müstəqil müəyyən etdiyini açıqlayıb.
Son illərdə baş verən bu və digər hadisələr özəl səhiyyə sektorunda nəzarət mexanizmlərinin gücləndirilməsi, tibbi xidmətlərin keyfiyyətinin artırılması və pasiyent hüquqlarının daha effektiv qorunması ilə bağlı müzakirələri yenidən aktuallaşdırıb. Bir çox hallarda araşdırmalar davam etsə də, cəmiyyət bu kimi hadisələrin təkrarlanmaması üçün daha ciddi nəzarət və şəffaflıq tələb edir.
Fəridə Əsədzadə
