Dünya üzrə koronavirusa qarşı 79 fərqli vaksin və 155 dərman inkişaf mərhələsindədir.
Bu barədə Avstriyanın Tibbi Texnologiyaları Qiymətləndirmə İnstitutu açıqlama verib. İnstitutdan verilən məlumata görə, 155 dərman vasitəsinin əksəriyyəti digər virus xəstəliklərinin müalicəsində istifadə olunmuş dərman pereparatlarıdır və onların "COVID-19"-un müalicəsində tətbiqi üçün xüsusi əsaslandırma tələb olunur.
79 peyvənd namizədindən isə hələ ki heç biri inkişaf mərhələsini tamamlamayıb. İnstitutun apardığı araşdırmaya görə, bu peyvəndlər hazırlanmasına görə 3 tipə bölünür: Canlı peyvəndlər (zədələnmiş virus ştamları ilə), ölü peyvəndlər (virus zülalları ilə) və gen əsaslı peyvəndlər (xüsusi DNT və ya mRNA ilə). Mütəxəssislərin verdiyi məlumata görə, vaksinlərin tam hazır olmasına 12-18 ay vaxt tələb olunacaq.
Qeyd edək ki dünya üzrə koronavirusa 2,428,332 insan yoluxub, 166,130 nəfər xəstəlik səbəbindən həyatını itirib.
