ABŞ Prezidenti Donald Tramp rusiyalı həmkarı Vladimir Putinlə ilk dəfə, ehtimal ki, Səudiyyə Ərəbistanında görüşəcəyini deyib.
AZXEBER.COM Qərb mediasına istinadən xəbər verir ki, Tramp bunu Ağ Evdə jurnalistlərlə görüşü zamanı deyib.
Görüşlə bağlı Tramp bu sözləri deyib:
"Nə edə biləcəyimizi bilirik. Düşünürəm ki, biz sülh üçün düzgün yoldayıq”.
Ukrayna Prezidenti Volodimir Zelenski ilə görüşünü xatırladan Tramp vurğulayıb ki, o, Ukraynanın ABŞ və Rusiya arasında müharibəyə son qoymaq üçün aparılan danışıqlarda bərabərhüquqlu iştirakçı olub-olmayacağı barədə dəqiq heç nə deməyib.
"İnsanlar həqiqətən də Prezident Putinin fikirlərinin nə olduğunu bilmirdilər. Amma böyük əminliklə deyə bilərəm ki, o da bunun bitməsini istəyir. Bu, yaxşı haldır və biz buna son qoymaq və mümkün qədər tez etmək üçün çalışacağıq", - Tramp deyib.
Tramp deyib ki, o və Putin qarşılıqlı səfərlər də daxil olmaqla, sıx əməkdaşlıq etmək barədə razılığa gəliblər və müvafiq komandalar dərhal Ukrayna ilə bağlı danışıqlara başlayacaq.
Tramp həmçinin Putinlə tezliklə üz-üzə görüşəcəyini söyləyərək "Mən ora gedəcəm və yəqin ki, Səudiyyə Ərəbistanında ilk dəfə görüşəcəyik. Biz vəliəhd şahzadəni (Səudiyyə vəliəhdi Məhəmməd bin Salman) tanıyırıq və məncə, görüşmək üçün çox yaxşı yer olardı".
Qeyd edək ki, Kremlin sözçüsü Dmitri Peskov dünən deyib ki, Putin Tramp və hökumət rəsmilərini Ukrayna məsələsini müzakirə etmək üçün Moskvaya dəvət edib.
Mikayıl
