Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının tibb elmləri doktoru Nuran Abdullayev əhalini Azərbaycanın bir sıra iri şəhər və rayonlarında növbəti dəfə tətbiq ediləcək sərt karantin günlərində tələb olunan qaydalara riayət etməyə çağırıb.
Bu barədə AZXEBER.COM-a açıqlamasında Nuran Abdullayev bildirib ki, əgər tətbiq edilən sərt karantin günlərinin qaydalarına riayət olunmasa, insanlar yenə də çıxıb istirahətə yollansalar və əhali virus barədə daha da maarifləndirilməsə bu, virusun yayılmasını genişləndirəcək:
"Ona görə də bütün vətəndaşları, xüsusən də sərt karantin tətbiq ediləcək Bakı, Sumqayıt, Abşeron, Gəncə, Yevlax, Cəlilabad, Lənkəran və Masallı sakinləri tələb olunan qaydalara riayət etməlidirlər. Bilirsiniz ki, artıq Azərbaycanda iki həftəlik sərt karantin rejimi tətbiq olunur. Burada vacib məqamlardan biri də bu dövr ərzində insanları maarifləndirməkdən ibarətdir, belə ki, əgər insanlar bu virusun təhlükəliliyini dərk etməyib və yayılmasının qarşısını bir tək özlərinin ala bilməsini başa düşməsələr iki həftəlik sərt karantin rejimi bir effekt verməyəcək və yoluxma, eləcə də ölüm sayları sərt karantin rejimindən sonra daha da artacaq.
Ona görə də mətbuatda, televiziyada və radioda, eləcə də sosial şəbəkələrdə insanları maarifləndirici layihələr etmək lazımdır. Onlar bir mənalı dərk etməlidir ki, virusa bir tək şəxsi məsuliyyət iradəsi ilə qalib gəlmək olar”, - azərbaycanlı alim bildirib.
Qeyd edək ki, 21 iyun saat 00:00-dan 5 iyul saat 06:00-dək Bakı, Sumqayıt, Abşeron, Gəncə, Yevlax, Cəlilabad, Lənkəran və Masallıda sərt karantin rejimi tətbiq ediləcək.
