Xəbər verdiyimiz kimi, Dövlət Təhlükəsizliyi Xidməti tərəfindən saxlanılan AXCP sədri Əli Kərimli həbs edilib.
Səbail Rayon Məhkəməsi bu dəqiələrdə qərarını açıqlayıb.
Təqsirləndirilən şəxsin istintaqdan yayınma, şahidlərə təsir etmə ehtimalları nəzərə alınaraq vəsatət əsaslı sayılıb.
Qərara əsasən Əli Kərimli barəsində 2 ay 13 gün həbs qətimkan tədbiri seçilib. O, məhkəmədən birbaşa DTX-nin istintaq təcridxanasına aparılıb.
Əli Kərimliyə yönəldilən ittihamlar ciddi maddələri əhatə etdiyindən, sübutlar təsdiqlənəcəyi təqdirdə onu uzunmüddətli azadlıqdan məhrumetmə cəzası gözləyə bilər. Bəs, ittihamlar sübuta yetiriləcəyi halda, o, neçə il azadlıqdan məhrum oluna bilər?
AZXEBER.COM-un məlumatıma görə Əli Kərimli haqqında ittihamlar təsdiqlənərsə, onu ömürlük həbs cəzası gözləyə bilər:
Belə ki, əgər sözügedən şəxslərə Cinayət Məcəlləsinin 278.1-ci maddəsi üzrə ittiham irəli sürülmüşdürsə və onlar xüsusilə ağır cinayət kateqoriyasına daxil edilən bu əməldə təqsirli bilinsələr, qanunvericilik 12 ildən 20 ilədək müddətə azadlıqdan məhrum etmə və ya istisna hallarda ömürlük azadlıqdan məhrumetmə cəzasını nəzərdə tutur. Həmin maddənin sanksiyası dövlətin konstitusiya quruluşunun zorla dəyişdirilməsi və ya hakimiyyətin zorla ələ keçirilməsi kimi yüksək ictimai təhlükəlilik dərəcəsinə malik əməllərin qarşısının alınmasına yönəlmişdir və buna görə də dövlət təhlükəsizliyinə qarşı cinayətlərin ən ağır hüquqi nəticələrlə müşayiət olunan qrupuna daxildir.
Eyni zamanda, istintaqın nəticələri, məhkəməyə təqdim olunacaq sübutların xarakteri, təqsirləndirilən şəxslərin davranışı, habelə yüngülləşdirici və ağırlaşdırıcı hallar cəzanın konkret həcminin müəyyən edilməsində mühüm rol oynayır. Hazırkı mərhələdə Əli Kərimli barəsində yalnız ittiham irəli sürülmüş və həbs qətimkan tədbiri seçilmişdir. Onun təqsirinin sübuta yetirilməsi və cəzanın növü barədə yekun qərar yalnız məhkəmənin gələcək hökmü ilə müəyyən olunacaq. Bu mərhələdə hüquqi olaraq qeyd edilə biləcək yeganə məqam odur ki, mövcud ittiham maddəsinin sanksiyası nəzəri baxımdan 12–20 il və ya ömürlük azadlıqdan məhrumetmə kimi geniş cəza diapazonu ehtiva edir.
Şahanə Ziyad
