"Aşura mərasmləri böyüklər üçün dərin mənəvi məna daşısa da, azyaşlı uşaqların bu mərasimlərdə iştirakı onların psixoloji vəziyyətinə təsir göstərə bilər".
AZXEBER.COM xəbər verir ki, bu sözləri əməkdar jurnalist Anar Yusifoğlu Məhərrəm məclislərində azyaşlıların iştirakına həssas yanaşmağın vacibliyi haqda deyib.
O, qeyd edib ki, böyüklərin dərk etdiyi matəm ab-havasını uşaqlar fərqli qəbul edə bilər:
"Hər il Məhərrəm ayında məscidlərdə, ziyarətgahlarda və digər ibadət məkanlarında minlərlə insan Kərbəla şəhidlərini yad edir. Haqq uğrunda mübarizənin, sədaqətin və fədakarlığın simvolu olan bu mərasimlər Azərbaycanda dini etiqad azadlığı çərçivəsində hörmətlə qarşılanır.
Bununla yanaşı, mütəxəssislər azyaşlı uşaqların bu cür mərasimlərdə iştirakına həssas yanaşmağın vacibliyini vurğulayırlar. Bildirilir ki, böyüklərin mənəvi baxımdan dərk etdiyi matəm ab-havası, sinəvurma mərasimləri və yüksək emosional mühit uşaqlar tərəfindən fərqli qəbul oluna bilər. Psixoloqların fikrincə, azyaşlılar hadisələrin mahiyyətindən çox, gördükləri səhnələri və yaşadıqları emosional təsirləri yadda saxlayırlar. Bu isə bəzi hallarda onların psixoloji durumuna mənfi təsir göstərə bilər".
Anar Yusifoğlu bildirib ki, uşaqların ilk xatirələri onların gələcək dünyagörüşünün formalaşmasında mühüm rol oynayır:
"Məhz buna görə də din xadimləri, psixoloqlar və aidiyyəti qurumlar valideynləri uşaqların yaş xüsusiyyətlərini nəzərə almağa çağırırlar. Qeyd olunur ki, uşaqların ilk xatirələri onların gələcək dünyagörüşünün formalaşmasında mühüm rol oynayır. Mütəxəssislər hesab edirlər ki, uşaqların həm mənəvi, həm də psixoloji sağlamlığının qorunması cəmiyyətin ümumi məsuliyyətidir. Onların fikrincə, Aşuranın əsas mesajlarından biri haqqı və ədaləti qorumaqdır ki, bu da uşaqları vaxtından əvvəl ağır emosional yüklənmədən qorumaqdan başlayır".
