Bu gün “Gündəlik Azərbaycan” və “Realniy Azerbaydjan” qəzetlərinin baş redaktoru Eynulla Fətullayev ölkə prezidenti İlham Əliyevin imzaladığı əfv fərmanı ilə azadlığa buraxılıb. 1496 gün həbsdə qalan bağ redaktor 2007-ci ilin aprelində çıxarılan birinci həbs qərarı ilə 2 il 6 ay müddətinə azadlıqdan məhrum edilib. Həmin ilin oktyabrında çıxarılan ikinci həbs qərarı nəticəsində onun cəzası 8 il 6 aya qaldırılıb. 2009-cu ilin dekabrında saxlandığı 12 saylı Cəzaçəkmə Müəssisəsində məhbus jurnalistin üzərindən narkotik vasitə tapıldığı açıqlanıb. Cinayət Məcəlləsinin 234.1 maddəsi ilə Eynulla Fətullayevə yeni cinayət işi açılıb. Bu iş üzrə ona 2 il 6 ay cəza verilib.

Hazırda evində olan E.Fətullayev onu ziyarətə gələnləri qarşılayır. Baş redaktoru ilk ziyarət edənlərdən “Azadlıq” qəzetinin baş redaktoru Qənimət Zahid və AXCP sədri Əli Kərimli də var. “Yeni Müsavat”ın baş redaktoru Rauf Arifoğlu hazırda paytaxtda olmadığı üçün həmkarını telefonla təbrik edib. 
Eynulla Fətullayev həbsxanadan çıxandan sonra Azadlıq Radiosuna verdiyi müsahibəsində deyib ki,  hələ ətrafda baş verənləri dərk etməyə çalışır. O deyib ki, Azərbaycan reallıqlarını nəzərə alanda əfv olunması həm möcüzə, həm də qanunauyğunluqdur.

Eynulla Fətullayev həbsdən çıxmağın təfərrüatını müxbirimizə danışıb. “Saat 6-da 1 saylı cəzaçəkmə müəssisənin rəisi Qəhrəman Qurbanov məni öz otağına çağırdı. Sonra rəis qarşıma 1 sənəd qoyub dedi ki, qol çək. Soruşanda bu nədir, cavab verdi ki, sən əfv olunmusan. Sonra Q.Qurbanov məni və sabiq polis rəisi Müşfiq Mədətovu öz xidməti avtomobili ilə birbaşa evimizə yola saldı.”

//Yeni Musavat

{jcomments off}