Tanınmış idman jurnalisti Gündüz Abbaszadənin "facebook" sosial şəbəkəsində yazdığı status dostlarını kövrəldib. AZXEBER.COM-un məlumatına görə, eks-telejurnalist 2005-ci ildə vəfat edən atasıyla bağlı xatirələrini dostlarıyla bölüşüb. Həmin yazını olduğu kimi təqdim edirik: "Darıxıram. Özü də burnumun ucu göynəyəcək qədər. Göynəmək dedim, qolumun göyərməyi yadıma düşdü. Məni 1 dəfə haqlı olaraq döymüşdün. Qolum göyərmişdi. Bilirəm ki, cəmi bir dəfə döymüsən. Ona da indi haqq qazandırıram. Mən də atayam. Övladıma heç zaman əl qaldırmağa əlim gəlməz. Gör mənim nə yalnışım olub ki, sən o həddə çatmısan. Üzümə baxanda, məni vurduğun üçün peşiman idin. İndi də mən peşimanam. Vurdurduğum üçün. Küsmüşdün məndən. 1 həftdə danışdırmadın. Bilmirəm indi də küsmüsən, ya yox? Yuxuma da girmirsən. Bu da lap darıxdırır adamı. Qeyri müəyyənlik insanı sıxan kimi. Ata, qeyri müəyyənliyə sən öyrənmişdin. Çox əzab çəkmişdin, bizə əziyyət çəkdirməmək üçün... Sən bunları yaxşı bilirsən. Odur ki, yuxuma gəl, bir iki sualım var. Axı, səndən başqa sualımı cavablandıracaq kimsəm yoxdu. Dostum idin, atam yox. Dostunu atdın getdin. Səndən sonra çoxlarına dost demişəm, ATA. Sənin gördüyün dostlarım var idi aaaa, onların çoxu yoxdu indi. Amma, ürəyini sıxma, yaxşı dostlar hələ qalıb. Yəqin indi düşünürsən: “Bu nə gic-gic danışır? Bu dünyanın əzab əziyyətinə dözməyib partlayan ürəyi necə sıxasan axı?! “ Nə bilim, ata, mənim üçün o ürək döyünür, o beyin düşünür. Ona görə də yuxuma gəl. Sualımı cavabsız qoyma! Elə etmə ki, mən yanına gəlim. Bu dərdə dözə bilməzsən yoxsa..."
