Strateji Araşdırmalar Mərkəzi (SAM) fəaliyyət göstərdiyi müddət ərzində Azərbaycanın iqtisadi inkişafına həsr olunmuş bir sıra tədbirlər həyata keçirib və araşdırmalar aparıb.
Gün.Az xəbər verir ki, bunu SAM-ın direktoru Fərhad Məmmədov sözügedən qurumun və Koreya Beynəlxalq İqtisadi Siyasət İnstitutunun iyulun 3-də Bakıda keçirdiyi 5-ci Koreya-Mərkəzi Asiya Beynəlxalq Forumunun açılış mərasimində çıxışı zamanı deyib.F.Məmmədovun qeyd etdiyinə görə, SAM-ın Azərbaycanın iqtisadi inkişafı ilə bağlı keçirdiyi tədbirlərin və apardığı araşdırmaların bir istiqamətini də ölkəmizin xarici iqtisadi əməkdaşlığı təşkil edir:“Bildiyiniz kimi Azərbaycanın qarşısına qoyduğu hədəflərdən biri də ölkədə qeyri-neft sektorunun inkişafına və artımına nail olmaqdır. Elə dövlət başçısının sərəncamı ilə imzalanmış “Azərbaycan-2020: gələcəyə baxış” inkişaf konsepsiyası da bunun bariz nümunəsidir.Onu da qeyd etmək istəyirəm ki, qeyri-neft sektorunun inkişafı dünyada, xüsusilə Avrasiya məkanında gedən iqtisadi inkişafdan kənarda baxıla bilməz. Bu ilin əvvəllərində Azərbaycanda Dünya İqtisadi Forumu tərəfindən keçirilən tədbirdə də məhz bu kontekstdən müzakirələr aparılmışdı.Eyni zamanda bu yaxınlarda Dünya İqtisadi Forumunun Bişkek şəhərindəki tədbirində də bu istiqamətdə müzakirələr aparılmış və Azərbaycan nümayəndələri də həmin tədbirdə iştirak edərək öz töhfələrini vermişdilər.Ötən ildən əməkdaşlıq etdiyimiz Koreya Beynəlxalq İqtisadi Siyasət İnstitutu da 4 dəfə Koreya-Mərkəzi Asiya Beynəlxalq Forumunu keçirib. Sonra biz belə bir qərara gəldik ki, növbəti 5-ci forum Azərbaycanda keçirilsin. Təbii ki, buradakı müzakirələr, eyni zamanda əməkdaşlıq etdiyimiz beyin mərkəzlərinin fikir və təhlilləri bizim üçün çox önəmlidir”.
