Azərbaycan musiqisinin canlı əfsanəsi, xalq artisti Alim Qasımov gənc və istedadlı həmkarı, duet ortağı Fərid Mərdlə birgə növbəti maraqlı layihəsini təqdim edib.
Onlar "Yar Qasidi-Caruso" adlı yeni mahnını fərqli musiqi üslubunda ifa edərək, bu sənət nümunəsini videoçarx şəklində sevənlərinə təqdim ediblər.
Qasımov və Mərd bu layihədə milli muğam elementlərini və dünya musiqisinin klassik incilərindən olan "Caruso"nun motivlərini bir araya gətirərək, olduqca orijinal bir kompozisiya ərsəyə gətiriblər.
İstedadlı müğənni Fərid Mərd AZXEBER.COM-a açıqlamasında layihənin necə ərsəyə gəlməsindən danışıb:
"Bir müddətdir ki, Xalq artisti Alim Qasımovla iş birliyinə başlamışıq. Mən məşqlərin birində məşhur italiyan tenor Pavarottinin ifasında eşitdiyimiz "Carusonu" səsləndirdim, Alim müəllim bir anda Şəhriyarın "Yar qasidi"nin sözləriylə möhtəşəm bir muğam oxudu. Həmin anda bütün musiqiçilərlə bərabər yaranan ahəngin şokunu yaşadıq və qərara gəldik ki, bu əsəri bərabər ərsəyə gətirək".
Aysel Hacızadə
