"Haiti millisinə qalib gəlmək istəyirik".
AZXEBER.COM xəbər verir ki, bunu futbol üzrə Azərbaycan milli komandasının baş məşqçisi Fernandu Santuş Haiti yığmasına qarşı keçirəcəkləri yoxlama oyunundan əvvəl baş tutan mətbuat konfransında deyib.
"Meydana çıxacaq futbolçuları müəyyənləşdirmişəm. Təbii ki, heyəti burada söyləyə bilməyəcəyəm. Keyfiyyətli futbolçulardan təşkil olunmuş yığmaya qarşı çıxış edəcəyik. Rəqibin son beş-altı oyununu izləyib, analiz etmişik. Məşqlərdə onların oyun üslublarına qarşı hazırlaşmışıq. Rəqib daha çox hücum futboluna önəm verir. Haiti top itkisindən sonra toparlanıb, yenidən hücuma çıxmağa çalışan bir yığmadır. Məşqlərimiz yüksək səviyyədə keçib. Haiti millisinə qalib gəlmək istəyirik. Düzdür, bu görüş bizə hər hansı xal qazandırmayacaq. Lakin yığma olaraq uduzmaq istəmirik", - Santuş bildirib.
O, Azərbaycan xalqını Novruz bayramını münasibətilə də təbrik edib.
"Onu deyə bilərəm ki, Azərbaycan Avropanın ən yaxşı 20 ölkəsindən biridir", - deyə millinin baş məşqçisi əlavə edib.
Qeyd edək ki, martın 22-də Mehdi Hüseynzadə adına Sumqayıt şəhər stadionunda keçiriləcək Azərbaycan - Haiti görüşü saat 21:45-də başlayacaq.
