Milli Məclisin bugünkü iclasında müzakirəyə çıxarılan Vergi Məcəlləsinə təklif edilən dəyişikliklərə əsasən, qanunvericiliyə "frilanser" anlayışının daxil edilməsi nəzərdə tutulur.
Layihəyə əsasən, frilanserlər vergi orqanında qeydiyyata (uçota) alındıqdan, sənaye və ya texnologiyalar parkının rezidenti kimi qeydiyyatdan keçərək müvafiq şəhadətnaməni əldə etdikdən sonra ölkə ərazisində fəaliyyət göstərə, xarici mənbələrdən gəlir əldə edə, həmçinin Vergi Məcəlləsində nəzərdə tutulan vergi güzəştləri və azadolmalardan yararlana biləcəklər.
Mövzu ilə bağlı AZXEBER.COM-a danışan iqtisadçı Elçin Rəşidov bildirib ki, təklifin əsas məqsədlərindən biri rəqəmsal iqtisadiyyatın inkişafını təşviq etmək və bu sahədə çalışan şəxslərin fəaliyyətini hüquqi çərçivəyə salmaqdır.
"Bu, hələ ki, təklif edilib. İlk növbədə mən hesab edirəm ki, son vaxtlar rəqəmsal iqtisadiyyatın inkişafı məsələsi gündəmdədir və bu sahədə fəaliyyət göstərənlərin vergi güzəştlərindən yararlana bilməsi üçün belə bir təklif edilib, düşünürəm. O cümlədən frilanserlər xarici sifarişçilərə də xidmət göstərə biləcək və oradan, xaricdən ölkəyə pul cəlb edə biləcəklər. Frilanserlərin bir çoxu kölgə iqtisadiyyatında vergidən yayınırdılar. Bu da leqallaşdırılmaqla məqsədlərdən biri ola bilər. Nəticədə həm iqtisadiyyat kölgədən çıxar, həm də hesab edirəm ki, yüksək ixtisaslı mütəxəssislərin ölkəyə cəlb olunmasına və burada qalmalarına şərait yaranar".
Fəridə Əsədzadə
