"Azərbaycanda bütün istiqamətlərdə aparılan ciddi islahatların qanunvericilik bazası media məkanına qədər genişlənir - ölkə parlamentinin müzakirə etməyə başladığı yeni qanun layihəsi onun müasirləşməsinə və səmərələşməsinə kömək edəcək".
Bu barədə "Report” İnformasiya Agentliyinin direktoru Fuad Hüseynəliyev CBC telekanalına müsahibəsində "Media haqqında" yeni qanun layihəsinin əhəmiyyətindən danışarkən deyib. O, yeni qanunun ölkəmiz üçün son dərəcə zəruri olduğunu vurğulayıb.
"İlk növbədə qeyd etmək istərdim ki, "KİV haqqında” köhnə qanun hələ 1999-cu ildə qəbul edilib və ondan sonra müəyyən dəyişikliklərə məruz qalıb, lakin hələ də ölkəmizdə mövcud olan bütün iş miqyasını əhatə etməyib. Bu, birinci növbədə internet və internet resurslarının inkişafı ilə bağlıdır, çünki köhnə qanunun çox hissəsi çap mediasını, qəzetləri, xəbər agentliklərinin fəaliyyətini tənzimləyir. Lakin hazırda ölkədə çoxlu sayda portalların fəaliyyəti qanundan kənarda qalır.
Yeni qanun layihəsində nəzərdə tutulub ki, bütün media portalları və agentlikləri bir-biri ilə əməkdaşlıq müqaviləsi bağlasın, yəni portallar müqavilə imzalanmadan məlumatı dərc edə bilməyəcək və ya onlar bizim xəbərlərimizin yalnız 1/3-dən istifadə edə biləcəklər. Bu, hazırda müşahidə etdiyimiz xəbər oğurluğunun miqdarını əhəmiyyətli dərəcədə azaldacaq. Üstəlik, bütün bunlar bizim fəaliyyət sahəmiz üçün çox zərərlidir”, - deyə F.Hüseynəliyev bildirib.
"Report” İnformasiya Agentliyinin direktorunun sözlərinə görə, qanun sadə dildə yazılmasına baxmayaraq, müəyyən təkmilləşdirmələr tələb edir.
"Mənim üçün heç anlaşılmazlıq olmayıb, amma müəyyən təkmilləşdirmələrə ehtiyac var və bu araşdırma parlamentdə müzakirə olunduğu kimi aparılacaq. Üstəlik, komissiyalarda müzakirəsi zamanı ayrı-ayrı alt komitələr yaradılacaq və onlara jurnalistlər də cəlb olunacaq ki, onlar qanun layihəsində tələb olunan konkret istiqamətləri, dəyişiklikləri verə bilsinlər ki, onu təkmilləşdirmə formasına çatdırsınlar”, - deyə Fuad Hüseynəliyev əlavə edib.
