Gənc aktrisa Mila Əminə sünii nəfəs aparatından ayrılıb.
Bu barədə PrimeTime.Az-a İstanbulda olan müğənni Rəqsanə İsmayılova məlumat verib. Sənətçi bildirib ki, hazırda Mila Əminənin yatdığı klinikadadır: "Milanın ürəyi aparatda ola-ola dayanıb. Həkimlər orqanlarını çatdırıb götürə bilmədilər. Təzyiqi də çox düşmüşdü".
Müğənni aktrisanın sabah dəfn olunacağını deyib: "Bu gün xəstəxanadan nəşini çıxarırlar. Sabah dəfn olunacaq. Çox pisəm. Anasını elə çarəsiz gördüm, çox pis oldum. Anası Milanı tək başına, atasız böyüdüb. Deyir, qəbiristanlıqda yatacam. Qızımdan sonra yaşaya bilmərəm".
Xatırladaq ki, bu gün səhər saatlarında anası Milanın orqanlarını ehtiyacı olan xəstələrə bağışlayacağını açıqlamışdı. Lakin son anda vəziyyət dəyişib, Milanın orqanlarını götürmək mümkün olmayıb. Çünki onun ürəyi aparatdan ayrılmadan öncə dayanıb.
